சென்னையில் இரவு முழுக்க டமால் டுமீல்.. கொட்டி தீர்த்த கனமழை.. இன்றும் கனமழைக்கு வாய்ப்பு

சென்னை: சென்னை மற்றும் அதன் புறநகர் பகுதிகளில் நள்ளிரவு முதல் இடி மற்றும் மின்னலுடன் பரவலாக மழை பெய்து வருகிறது. விடிய விடிய கனமழை கொட்டி தீர்த்தது. சென்னையில் இன்றும் கனமழைக்கு வாய்ப்புள்ளதாக வானிலை ஆய்வு மையம் தெரிவித்துள்ளது.

தமிழகத்தில் கடந்த சில தினங்களாக மழை பெய்து வருகிறது. நேற்று முன்தினம் இரவு மதுரை, புதுக்கோட்டை பகுதிகளில் மழை வெளுத்து வாங்கியது. அதே போல் கோவை, நீலகிரி, சேலம் மாவட்டங்களில் நேற்று நல்ல மழை பெய்தது.

இந்த நிலையில் தமிழ்நாட்டில் அநேக இடங்களில் இடி, மின்னலுடன் மிதமான மழையும், விழுப்புரம், கடலூர், அரியலூர், பெரம்பலூர், மயிலாடுதுறை, தஞ்சாவூர், திருவாரூர், நாகப்பட்டினம், புதுக்கோட்டை மாவட்டங்கள், புதுச்சேரி, காரைக்கால் பகுதிகளில் ஓரிரு இடங்களில் கன முதல் மிக கனமழையும், சென்னை, திருவள்ளூர், காஞ்சீபுரம், செங்கல்பட்டு, ராணிப்பேட்டை, திருவண்ணாமலை, கள்ளக்குறிச்சி, திருச்சி, சிவகங்கை, ராமநாதபுரம் மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது என வானிலை ஆய்வு மையம் எச்சரித்துள்ளது.

இதனிடையே சென்னையில் இரவு முதல் பரவலாக மழை பெய்து வருகிறது. சென்னை ராமபுரம், பள்ளிக்கரணை, அனகாபுத்தூர், கிண்டி, அடையாறு பகுதிகளில் மழை பெய்கிறது. அசோக்நகர், வடபழனி, ஈக்காட்டுத்தாங்கல், மயிலாப்பூர், அம்பத்தூர், குரோம்பேட்டையில் மழை பெய்கிறது. இதனால் தாழ்வான பகுதிகளில் தண்ணீர் தேங்கியது. இதனால் வாகன ஓட்டிகள் சிரமமடைந்தனர்.

விடுமுறை நாட்கள் முடிந்து சென்னைக்கு சொந்த வாகனங்களில் திரும்பிய மக்கள் மழை மற்றும் போக்குவரத்து நெரிசலால் சிரமமடைந்தனர். இதேபோல் நேற்று கோவையிலும் கனமழை கொட்டி தீர்த்தது. இதனால் பல்வேறு இடங்களில் மழைநீருடன் கழிவுநீரும் கலந்தது. ஒருசில இடங்களில் வீடுகளுக்குள் தண்ணீர் சென்றது. இதனால் பொதுமக்கள் கடும் சிரமமடைந்தனர்.

முன்னதாக சென்னை வானிலை ஆய்வு மையம் வெளியிட்ட வானிலை முன்னறிவிப்பில், சென்னையை பொறுத்தவரை அடுத்த 24 மணி நேரத்திற்கு வானம் ஓரளவு மேகமூட்டத்துடன் காணப்படும். நகரின் ஒரு சில பகுதிகளில் இடி, மின்னலுடன் கூடிய லேசானது முதல் மிதமான மழை பெய்ய வாய்ப்புள்ளது. அதிகபட்ச வெப்ப நிலை 33-34 டிகிரி செல்சியை ஒட்டியும் குறைந்தபட்ச வெப்ப நிலை 27-28 டிகிரி செல்சியஸ் ஆகவும் இருக்க கூடும் என்று சென்னை வானிலை ஆய்வு மையம் தெரிவித்துள்ளது.

English summary

Widespread rain accompanied by thunder and lightning has been lashing Chennai and its suburbs since midnight. At dawn it was raining heavily. Heavy rains are likely in Chennai today, according to the Meteorological Department.