வெயிலுக்கு இடையே! அடுத்த 2 மணி நேரம் கொளுத்த போகும் மழை.. இந்த 7 மாவட்டங்களில் ஜில் கிளைமேட் தான்

சென்னை: தமிழகத்தில் கடந்த இரண்டு நாட்களாக காலை நேரங்களில் வெயிலும், மாலை என்றால் மழையும் பெய்து வருகிறது. இன்றும் பகல் முழுக்க வெயில் சுட்டெரித்த நிலையில் அடுத்த 2 மணி நேரத்தில் 7 மாவட்டங்களில் மழைக்கு வாய்ப்பு இருப்பதாக வானிலை மையம் கூறியுள்ளது. தஞ்சை, புதுக்கோட்டை, தென்காசி, கோவை உள்பட 7 மாவட்டங்களில் இடி மற்றும் மின்னலுடன் கூடிய மிதமான மழைக்கு வாய்ப்பு இருப்பதாக வானிலை மையம் கூறியுள்ளது.

தமிழகத்தில் தற்போது தென்மேற்கு பருவமழை பெய்து வருகிறது. வழக்கமாக ஜூன் மாத தொடக்கத்தில் தான் பருவமழை தொடங்கும். ஆனால் நடப்பு ஆண்டில் மே மாத இறுதியிலேயே மழை தொடங்கி வெளுத்து வாங்கியது. மேற்கு தொடர்ச்சி மலைப்பகுதியை ஒட்டிய மாவட்டங்களில் கனமழை கொட்டி தீர்த்தது.

7 மாவட்டங்களில் மழைக்கு வாய்ப்பு

கோவை, நீலகிரி, தென்காசி, தேனி மாவட்டங்களில் பல்வேறு இடங்களில் கனமழை பெய்தது. இடையிடையே தமிழகத்தின் சென்னை, மதுரை, ராமநாதபுரம், திருப்பூர், தூத்துக்குடி என பரவலாக மழை பெய்தது. பின்னர் கடந்த ஒரு வாரமாக வெயில் கொளுத்தி எடுக்கிறது. நேற்றும் தமிழகத்தில் மதியம் வரை வெயில் அடித்தது. பின்னர் காற்றுடன் கூடிய மழை பெய்தது. சென்னையிலும் நேற்று மாலை பல்வேறு இடங்களில் மழை பெய்தது.

இந்த நிலையில் இன்றும் காலையில் பெரும்பாலான இடங்களில் வெயில் சுட்டெரித்தது. இந்த நிலையில் சுட்டெரிக்கும் வெயிலுக்கு மத்தியில் மழை பெய்ய வாய்ப்பு இருப்பதாக சென்னை வானிலை மையம் தெரிவித்துள்ளது. அடுத்த 2 மணி நேரத்தில் அதாவது இன்று மாலை 4 மணி வரை 7 மாவட்டங்களில் இடி மின்னலுடன் மழை பெய்ய வாய்ப்பு இருப்பதாக வானிலை மையம் கூறியுள்ளது.

வானிலை மைய அறிவிப்பில், "தமிழகத்தில் இன்று மாலை 4 மணி வரை, புதுக்கோட்டை, தஞ்சாவூர், திருப்பூர், நீலகிரி, திண்டுக்கல், தென்காசி மற்றும் கோவை மாவட்டத்தின் மலைப்பகுதிகளில் இடி மின்னலுடன் கூடிய லேசானது முதல் மிதமான மழை பெய்ய வாய்ப்பு உள்ளது" என்று கூறப்பட்டுள்ளது.

சென்னையில் நாளை எப்படி?

முன்னதாக சென்னை வானிலை மையம் கூறுகையில், “சென்னையில் இன்று (11-06-2025) வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசான / மிதமான மழை பெய்ய வாய்ப்புள்ளது. அதிகபட்ச வெப்பநிலை 36-37° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.

சென்னையில் நாளை (12-06-2025) வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய லேசான / மிதமான மழை பெய்ய வாய்ப்புள்ளது. அதிகபட்ச வெப்பநிலை 37° செல்சியஸை ஒட்டியும், குறைந்தபட்ச வெப்பநிலை 25-26* செல்சியஸை ஒட்டியும் இருக்கக்கூடும்.

மீனவர்களுக்கு எச்சரிக்கை

தமிழக கடலோரப்பகுதிகளை பொறுத்தவரை, இன்றும் நாளையும் தென்தமிழக கடலோரப்பகுதிகள், மன்னார் வளைகுடா மற்றும் அதனை ஒட்டிய குமரிக்கடல் பகுதிகளில் சூறாவளிக்காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 65 கிலோ மீட்டர் வேகத்திலும், வடதமிழக கடலோரப்பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்.

ஜூன்.13 மற்றும் 14ம் தேதிகளில், தென்தமிழக கடலோரப்பகுதிகள், மன்னார் வளைகுடா மற்றும் அதனை ஒட்டிய குமரிக்கடல் பகுதிகளில் சூறாவளிக்காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 65 கிலோ மீட்டர் வேகத்திலும், வடதமிழக கடலோரப்பகுதிகளுக்கு அப்பால் உள்ள தென்மேற்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்.

ஜூன்.15 தென்தமிழக கடலோரப்பகுதிகள், மன்னார் வளைகுடா மற்றும் அதனை ஒட்டிய குமரிக்கடல் பகுதிகளில் சூறாவளிக்காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 65 கிலோ மீட்டர் வேகத்திலும், வடதமிழக கடலோரப்பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். இவ்வாறு அதில் கூறப்பட்டுள்ளது.

English summary

For the past two days in Tamil Nadu, the mornings have been hot and sunny, while the evenings have brought rainfall. Today as well, after a scorching day, the Meteorological Department has forecast rain in the next two hours in 7 districts, including Thanjavur, Pudukottai, Tenkasi, and Coimbatore. Moderate rain accompanied by thunder and lightning is expected in these areas.