சென்னையில் காலை 10 மணிக்கு ஆரம்பித்த மழை.. நேரம் செல்ல செல்ல அடியோடு மாறுதே வானிலை

Updated: Wednesday, December 18, 2024, 15:52 [IST]

Subscribe to Oneindia Tamil

சென்னை: சென்னையில் இன்று காலை 10 மணி அளவில் லேசான சாரலாகவே மழை ஆரம்பித்தது. மிகவும் மிதமான சாரல் மழையே பிற்பகல் 3 மணி வரையிலும் பெய்து கொண்டிருந்தது. ஆனால் நேரம் செல்ல செல்ல மழையின் வேகம் அதிகரிக்க தொடங்கி உள்ளது. சாரல் மழை அடை மழையாக கொட்டி வருகிறது. சாலைகளில் தாழ்வான பகுதிகளில் தண்ணீர் தேங்க தொடங்கி உள்ளது. தொடர்ந்து கனமழை பெய்து வருவதால் மக்கள் அவதிப்படுகிறார்கள்.

தெற்கு வங்கக்கடலில் நிலவி வந்த காற்றழுத்த தாழ்வுப் பகுதி, தென் மேற்கு வங்கக்கடல் பகுதிகளில் நிலைக் கொண்டு இருந்து வருகிறது. இந்த காற்றழுத்த தாழ்வுப் பகுதி, தீவிர காற்றழுத்த தாழ்வுப் பகுதியாக வலுப்பெற்று மேற்கு-வடமேற்கு திசையில் தமிழக கடலோரப் பகுதிகளை நோக்கி நகர இருக்கிறது.

முன்னதாக இது காற்றழுத்த தாழ்வு மண்டலம் வரை வலுப்பெறக்கூடும் என கணிக்கப்பட்ட நிலையில், தீவிர காற்றழுத்த தாழ்வுப் பகுதியாக தமிழக கடலோரப் பகுதிகளை அடைய உள்ளது. இதன் காரணமாக இன்றும், நாளையும் வட கடலோர மாவட்டங்களில் பரவலாக நல்ல மழைக்கு வாய்ப்பு இருப்பதாகவும், தமிழ்நாட்டில் இதர பகுதிகளிலும் மழை பெய்வதற்கான சூழல் உள்ளதாகவும் சென்னை வானிலை ஆய்வு மையம் கூறியிருந்தது.

மேலும் இந்த காற்றழுத்த தாழ்வு பகுதி காரணமாக சென்னை, செங்கல்பட்டு, திருவள்ளூர், காஞ்சிபுரம் மாவட்டங்களில் ஓரிரு இடங்களில் கன முதல் மிக கனமழையும், விழுப்புரம், கடலூர் மாவட்டங்களில் ஓரிரு இடங்கள், புதுச்சேரியில் கனமழையும் பெய்ய வாய்ப்பு உள்ளதாக வானிலை ஆய்வு மையம் கணித்திருந்தது. வானிலை மையத்தின் கணிப்பின்படியே மேககூட்டங்கள் சென்னை செங்கல்பட்டு, திருவள்ளூர், உள்ளிட்ட மாவட்டங்களில் மெல்ல மெல்ல நகரத்தொடங்கியது.

மழை மேகங்கள் காரணமாக காலை 10 மணிக்கு தொடங்கிய மழை, முதலில் லேசான மழையே பெய்தது. இந்த மழை மேலே மொட்டை மாடிகளில் துணி காயப்போடுவரை எச்சரிக்கும் வகையில் இருந்தது. அதன்பிறகு சற்று மழை தடித்தது. ஆனால் பயப்படும் வகையில் மழை இல்லை.. மிதமான சாரலாக மழை சென்னையில் பிற்பகல் 3 மணி வரை தொடர்ந்து கொண்டிருந்தது. ஆனால் நேரம் செல்ல செல்ல மழையின் வேகம் அதிகரிக்க தொடங்கி உள்ளது. மிதமான மழை தற்போது அடைமழையாக மாறியிருக்கிறது... வட சென்னை பகுதிகளில் மழை வெளுத்து வாங்கி வருகிறது. தாழ்வான பகுதிகளில் தண்ணீர் தேங்க தொடங்கி உள்ளது. மழையின் வேகம் தீவிரமாகி வருகிறது. அதேநேரம் தென்சென்னை பகுதிகளில் மிதமான மழைதான் பெய்து வருகிறது.