வெயிலுக்கு நடுவே.. இன்று முதல் அடுத்த ஒரு வாரம் இடி, மின்னலுடன் மழை வெளுக்கும்.. வானிலை அப்டேட்

சென்னை: தமிழகத்தில் நேற்று நெல்லை மாவட்டத்தில் ஒரு சில இடங்களில் மழை பெய்த நிலையில் இன்றும் மேற்கு தொடர்ச்சி மலை மாவட்டங்கள், தென்தமிழக கடலோர மாவட்டங்கள் மற்றும் டெல்டா மாவட்டங்களில் இடி, மின்னல் பலத்த காற்றுடன் கூடிய மழை வெளுக்கும் என வானிலை மையம் கூறியுள்ளது. அதே நேரம் சென்னையை பொறுத்தவரை அதிக வெப்பநிலையும், அதிக ஈரப்பதமும் இருக்கும் நிலையில், அசெளகரியம் ஏற்படலாம் என கூறியுள்ளது.

தமிழகத்தில் கோடை வெயில் வெளுத்து வாங்கி வருகிறது. மதிய நேரங்களில் வெளியில் செல்லவே அச்சப்படும் அளவுக்கு வெயில் சுட்டெரிக்கிறது. அதே சமயம் தென் தமிழகத்தில், மேற்கு தொடர்ச்சி மலைப்பகுதிகளில் காற்றழுத்த தாழ்வு பாதை காரணமாக ஒரு சில இடங்களில் மழை பெய்து வருகிறது. நேற்றும் நெல்லையில் ஒரு சில இடங்களில் மழை கொட்டியது. இன்று காலையிலும் குமரி மற்றும் நெல்லை மாவட்டங்களில் ஒரு சில இடங்களில் மழை பெய்தது.

காற்றழுத்த தாழ்வு பாதை

இந்த நிலையில் இன்று முதல் வரும் 26 ஆம் தேதி வரை தமிழகத்தில் இடி, மின்னலுடன் பலத்த காற்றுடன் கூடிய மழை பெய்யும் என வானிலை மையம் கூறியுள்ளது. இது குறித்து வெளியான அறிவிப்பில் கூறப்பட்டிருப்பதாவது:- தெலுங்கானா முதல் குமரிக்கடல் வரை ராயலசீமா மற்றும் உள் தமிழகம் வழியாக ஒரு வளிமண்டல காற்றழுத்த தாழ்வு பாதை (Trough) சுமார் 1.5 கிமீ உயரம் வரை நிலவுகிறது.

இதனால் இன்று 21-04-2026 மேற்கு தொடர்ச்சி மலை மாவட்டங்கள், தென்தமிழக கடலோர மாவட்டங்கள் மற்றும் டெல்டா மாவட்டங்களின் கடலோர பகுதிகளில் ஓரிரு இடங்களிலும், காரைக்கால் பகுதிகளிலும் இடி, மின்னல் மற்றும் பலத்த காற்றுடன் கூடிய (மணிக்கு 30 முதல் 40 கிலோ மீட்டர் வேகத்தில்) லேசான மழை பெய்யக்கூடும். ஏனைய தமிழகம் மற்றும் புதுவையில் வறண்ட வானிலை நிலவக்கூடும்.

பலத்த காற்றுடன் மழை வெளுக்கும்

22-04-2026 மற்றும் 23-04-2026: மேற்கு தொடர்ச்சி மலை மாவட்டங்கள், தென்தமிழக கடலோர மாவட்டங்கள் மற்றும் டெல்டா மாவட்டங்களின் கடலோர பகுதிகளில் ஓரிரு இடங்களிலும், காரைக்கால் பகுதிகளிலும் இடி, மின்னல் மற்றும் பலத்த காற்றுடன் கூடிய (மணிக்கு 30 முதல் 40 கிலோ மீட்டர் வேகத்தில்) லேசானது முதல் மிதமான மழை பெய்யக்கூடும். ஏனைய தமிழகம் மற்றும் புதுவையில் வறண்ட வானிலை நிலவக்கூடும்.

24-04-2026 முதல் 26-04-2026 வரை மேற்கு தொடர்ச்சி மலை மாவட்டங்கள், தென் தமிழகம் மற்றும் டெல்டா மாவட்டங்களில் ஓரிரு இடங்களிலும், காரைக்கால் பகுதிகளிலும் லேசானது முதல் மிதமான மழை பெய்யக்கூடும். ஏனைய தமிழகம் மற்றும் புதுவையில் வறண்ட வானிலை நிலவக்கூடும்.

அதிகபட்ச வெப்பநிலை பற்றிய முன்னறிவிப்பு:

இன்று முதல் 24-04-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றத்திற்கான வாய்ப்பு குறைவு, எனினும் சற்று உயரக்கூடும். உள் தமிழக மாவட்டங்களில், அதிகபட்ச வெப்பநிலை ஒருசில இடங்களில் 2-3° செல்சியஸ் இயல்பை விட அதிகமாக இருக்கக்கூடும். கடலோர தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டியே இருக்கக்கூடும். அதிக வெப்பநிலையும், அதிக ஈரப்பதமும் இருக்கும் நிலையில், கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் அசெளகரியம் ஏற்படலாம்.

சென்னையில் இன்று கிளைமேட் எப்படி?

சென்னையில் இன்று (21-04-2026): வானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 37-38° செல்சியஸை ஒட்டியும், குறைந்தபட்ச வெப்பநிலை 28° செல்சியஸை ஒட்டியும் இருக்கக்கூடும். அதிக வெப்பநிலையும், அதிக ஈரப்பதமும் இருக்கும் நிலையில், அசெளகரியம் ஏற்படலாம்.

English summary

Rain with Thunderstorms to Lash Tamil Nadu for a Week Amid Heatwave: The India Meteorological Department has forecast thunderstorms with gusty winds across western ghats districts, southern coastal areas, and delta regions of Tamil Nadu over the next week. While places like Tirunelveli saw rainfall yesterday, Chennai is expected to experience high temperatures and humidity, causing discomfort.