இன்னைக்கு செம சம்பவம் வெயிடிங்.. பல இடங்களில் கொட்ட போகுது மழை.. லிஸ்டில் உங்க ஊர் இருக்கா பாருங்க!

சென்னை: தமிழ்நாட்டில் கடந்த சில நாட்களாகவே நல்ல மழை பெய்து வருகிறது. கோடை வெயிலுக்கு இதமாகப் பெய்யும் இந்த மழையால் மக்கள் மகிழ்ச்சியில் உள்ளனர். இதற்கிடையே இன்று தமிழகத்தில் எங்கெல்லாம் மழை இருக்கும்.. சென்னை கிளைமேட் எப்படி இருக்கும் என வானிலை மையம் கூறியிருக்கிறது என்பதை நாம் பார்க்கலாம்.

கடந்த சில வாரங்களாகவே தமிழகத்தில் கோடை வெயில் உச்சத்தில் இருந்தது. பல்வேறு பகுதிகளிலும் வெப்பம் 100 டிகிரி பாரன்ஹீட்டை கடந்த நிலையில், மக்களின் இயல்பு வாழ்க்கை கடுமையாகப் பாதிக்கப்பட்டுள்ளது. அதீத வெப்பம் காரணமாக மக்கள் மதிய நேரங்களில் வெளியே வரவே தயங்கும் சூழலே இருந்தது.

தமிழகத்தில் மழை

இதற்கிடையே கடந்த சில நாட்களாகத் தமிழக வானிலை சட்டென மாறியுள்ளது. பல்வேறு இடங்களிலும் நல்ல மழை பெய்து வருகிறது. கோடை காலத்தில் சட்டென பெய்த இந்த மழையால் வெப்பம் குறைந்து குளிர்ச்சியான வானிலையே காணப்படுகிறது. இதற்கிடையே வரும் நாட்களில் என்ன மாதிரியான வானிலை நிலவுகிறது என்பதை நாம் பார்க்கலாம்.

இது தொடர்பாக வானிலை மையம் வெளியிட்டுள்ள செய்திக்குறிப்பில், "அடுத்த 7 நாட்களைப் பொறுத்த அளவில், தென்கிழக்கு வங்கக்கடல் மற்றும் அதனை ஒட்டிய பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது. தென்னிந்தியப் பகுதிகளின் மேல் ஒரு வளிமண்டல கீழடுக்கு சுழற்சி நிலவுகிறது

எங்கெல்லாம் மழை பெய்யும்

இதனால் இன்றைய தினம் தென் தமிழகத்தில் ஒரு சில இடங்களிலும், வட தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னல் மற்றும் பலத்த காற்றுடன் கூடிய (மணிக்கு 30 முதல் 40 கிலோ மீட்டர் வேகத்தில்) லேசானது முதல் மிதமான மழை பெய்யக்கூடும். கோயம்புத்தூர் மாவட்ட மலைப்பகுதிகள், நீலகிரி, தேனி, திண்டுக்கல் மற்றும் தென்காசி மாவட்டங்களில் ஓரிரு இடங்களில் கன மழை பெய்ய வாய்ப்புள்ளது. நாளை முதல் ஏப்ரல் 11ம் தேதி வரை தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

சென்னை கிளைமேட்

சென்னையில் இன்று வானம் ஓரளவு மேகமூட்டத்துடன் காணப்படும். ஒரு சில பகுதிகளில் லேசான மழை பெய்ய வாய்ப்புள்ளது.அதிகபட்ச வெப்பநிலை 33-34° செல்சியஸை ஒட்டியும், குறைந்தபட்ச வெப்பநிலை 27-28° செல்சியஸை ஒட்டியும் இருக்கக்கூடும்.

வெப்பத்தைப் பொறுத்தவரை இன்று தமிழகத்தில் அதிகபட்ச வெப்பநிலையில் பெரிய மாற்றத்திற்கான வாய்ப்பு குறைவு. நாளை முதல் ஏப்ரல் 9ம் தேதி வரை தமிழகத்தில் அதிகபட்ச வெப்பநிலை ஒரு சில இடங்களில் 2-3° செல்சியஸ் வரை படிப்படியாக உயரக்கூடும். இயல்பு நிலையிலிருந்து அதிகபட்ச வெப்ப அளவின் வேறுபாட்டை பொறுத்த அளவில், இன்று தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை பொதுவாக இயல்பை ஒட்டி இருக்கக்கூடும். நாளை முதல் ஏப்ரல் 9ம் தேதி வரை தமிழகத்தில் அதிகபட்ச வெப்பநிலை ஓரிரு இடங்களில் 2-3° செல்சியஸ் இயல்பை விட அதிகமாக இருக்கக்கூடும்.

மீனவர்களுக்கான எச்சரிக்கை

இன்று அந்தமான் கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். நாளைய தினம் அந்தமான் கடல் பகுதிகள், அதனை ஒட்டிய தென்கிழக்கு மற்றும் மத்திய கிழக்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்.

வரும் ஏப்ரல் 8ம் தேதி அந்தமான் கடல் பகுதிகள், தென்கிழக்கு வங்கக்கடலின் கிழக்குப் பகுதிகள் மற்றும் அதனை ஒட்டிய மத்திய கிழக்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும். ஏப்ரல் 9ம் தேதி தென்கிழக்கு வங்கக்கடலின் வடக்கு பகுதிகள் மற்றும் அதனை ஒட்டிய மத்திய கிழக்கு வங்கக்கடல் பகுதிகளில் சூறாவளிக்காற்று மணிக்கு 35 முதல் 45 கிலோ மீட்டர் வேகத்திலும் இடையிடையே 55 கிலோ மீட்டர் வேகத்திலும் வீசக்கூடும்" என்று வானிலை மையம் எச்சரிக்கை விடுத்துள்ளது.

English summary

Heavy rain is expected in various parts of tamil nadu today (தமிழ்நாட்டில் இன்று பல்வேறு பகுதிகளிலும் நல்ல மழை இருக்கும்): Western parts of tamil nadu will receive good rain today.