அமெரிக்க வானொலியில் தேமதுரத் தமிழோசை!

சென்றிடுவீர் எட்டுத்திக்கும் கலைச்செல்வங்கள் யாவும் கொணர்ந்திங்கு சேர்ப்பீர்

என்று சொன்னான் பாரதி அன்று. ஆனால் இன்றோ தமிழ்நாட்டில் 'இங்கிலிஷ்' மோகம் தலைவிரித்தாடுகிறது. இந்நிலையில், அமெரிக்காவின் ஹூஸ்டன் மாநகர வானொலி நிலையத்தில் நல்ல தமிழ் நிகழ்ச்சிகள் ஒலிபரப்பப்படுகின்றன என்று சொன்னால் உங்களால் நம்பமுடிகிறதா? உண்மையை நம்பித்தானே தீர வேண்டும்!

ஹூஸ்டன் மாநகர நண்பர்கள் சிலர் இணைந்து 'கலக்கல் கதம்பம்' என்ற தமிழ் நிகழ்ச்சியை வாரம் தோறும் சனிக்கிழமை அன்று மாலை (அமெரிக்க மத்தியப் பகுதி நேரப்படி - Central time) 6 முதல் 8 மணி வரை நடத்துகின்றனர். குழந்தைகள் முதல் பெரியவர் அனைவரையும் மகிழ்விக்கும் வகையில் நிகழ்ச்சிகள் இருப்பதாலேயே இந்தப் பெயர் என்கிறார்கள் இதன் தயாரிப்பாளர்கள்.
இந்த நிகழ்ச்சிகளை ஹூஸ்டனில் 1050 AM அலைவரிசையில் அல்லது இவர்களின் இணையத்தளம் (www.houstontamil.com) வழியாக நேரடியாகக் கேட்கலாம். கடந்த வார நிகழ்ச்சிகளின் பதிவுகளையும் இவர்கள் இணையத் தளத்தில் பதிந்து வைத்திருப்பது இன்னொரு சிறப்பு.

கதை நேரம், வினாடி வினா, தெரிந்த பாடல்-தெரியாத ராகம், வெட்டிப் பேச்சு, விவாத மேடை முதலான பல்சுவை நிகழ்ச்சிகளுடன் பஞ்ச தந்திரம், திரை விமர்சனம், நேயர் விருப்பம் போன்ற திரைப்படம் தொடர்பான நிகழ்ச்சிகளும் உண்டு.

நிகழ்ச்சிகளில் நேயர்கள் கலந்துகொள்ளவும் வாய்ப்புண்டு. கடந்த வாரம் 'தமிழுக்கும் அமுதென்று பேர்' நிகழ்ச்சியில் 3 குழந்தைகள் உட்பட 7 பேர் (அமெரிக்கத் தமிழர்கள்) ஆங்கிலம் கலவாத தமிழ் பேசியது பலரையும் வியப்புக்குள்ளாக்கியது.

மெல்லத் தமிழினிச் சாகும் அந்த மேற்கு மொழிகள் புவிமிசையோங்கும் என்றந்தப்பேதை உரைத்தான்

சாகாவரம் பெற்றது தமிழ். அது பல வடிவத்தில் வாழும் என்பதற்கு பல சாட்சிகள் உண்டு. நல்ல முயற்சி எடுத்துவரும் தமிழர் அனைவருக்கும் தமிழ்த் தாயின் ஆசிகள் உரித்தாகுக.