வைகாசி விசாகம்-திருச்செந்தூருக்கு 100 சிறப்பு பேருந்து

திருச்செந்தூர்: வைகாசி விசாகத்தை முன்னிட்டு தென் மாவட்டங்களிலிருந்து திருச்செந்தூருக்கு 100 சிறப்பு பேருந்துகள் இயக்கப்படும் என அறிவிக்கப்பட்டுள்ளது.

திருச்செந்தூர் சுப்பிரமணிய சுவாமி கோயிலில் வரும் ஜூன் 5ம் தேதி வைகாசி விசாக திருவிழா நடக்கிறது. இத் திருவிழாவுக்கு 5 லட்சத்திற்கும் அதிகமாக மக்கள் வருவர் என எதிர்பார்க்கப்படுகிறது.

விழாவில் பங்கேற்க வரும் பக்தர்களுக்கு தேவையான வசதிகள் செய்வது குறித்து அதிகாரிகள் ஆலோசனை கூட்டம் கோயில் வாளகத்தில் நடந்தது. ஆர்டிஓ போஸ் தலைமை வகித்தார்.

இணை ஆணையர் பாஸ்கரன், டிஎஸ்பி சந்திரபால், அறங்காவலர் வக்கீல் சந்திரசேகரன், தங்கதுரை, தாசில்தார் முத்துகிருஷ்ணன் ஆகியோர் முன்னிலை வகித்தனர்.

கூட்டத்தில், வைகாசி விசாக திருவிழாவை முன்னிட்டு அரசு போக்குவரத்து கழகம் சார்பில் 100 சிறப்பு பஸ்கள் மதுரை, ராமநாதபுரம், விருதுநகர், நெல்லை, தூத்துக்குடி, கன்னியாகுமரி ஆகிய ஊர்களிலிருந்து இயக்கப்படும். 3 நாட்கள் சிறப்பு ரயில்கள் இயக்க பரிந்துரைக்கப்பட்டுள்ளது.

கோயில் வாளகம், நகர பகுதிகளில் 15 இடங்களில் தண்ணீர் தொட்டி அமைப்பது, நகரில் அவ்வப்போது சேரும் குப்பைகளை அகற்ற 75 சுகாதார பணியாளர்களை ஈடுபடுத்துவது, தீயணைப்பு துறை சார்பில் 3 இடங்களில் தீயணைப்பு வண்டிகளை நிறுத்தி 64 பணியாளர்களை ஈடுபடுத்த முடிவு செய்யப்பட்டது.

மேலும், கடலில் பக்தர்கள் குளிப்பதற்கு பாதுகாப்பு வளையம் அமைப்பது, வைகாசி விசாக நாட்களில் 2 லட்சம் லிட்டர் குடிநீர் சப்ளை செய்வது, சுகாதார துறை சார்பில் 24 மணி நேரம் மருத்துவ குழுவை தயார் நிலையில் வைப்பது, ஆறுமுகநேரி அடைக்கலபுரம் ரோட்டில் தனிக்குழு அமைப்பது, பாதுகாப்பு பணிக்காக கோயில் வாளகத்தில் 540 போலீசாரை ஈடுபடுத்தபடுவது என முடிவெடுக்கப்பட்டது.

சன்னதி தெருவில் போக்குவரத்து நெருக்கடி மற்றும் நகரில் போக்குவரத்து நெரிசல் குறித்தும் கூட்டத்தில் விவாதிக்கப்ப்டடது. இதை தொடர்ந்து வைகாசி விசாக நாளில் பக்தர்களுக்கு இடையூறு இல்லாத வகையில் போக்குவரத்து மாற்றம் செய்யப்படும் ஆகியவை உள்ளிட்ட தீர்மானங்கள் நிறைவேற்றப்பட்டது.