பெண் வயிற்றில் 18 கிலோ கட்டி-யை அகற்றி டாக்டர்கள் சாதனை

மதுரை: மதுரையில் உள்ள தேவகி புற்றுநோய் மருத்துவ மனையில் இளம் பெண் ஒருவருக்கு சுமார் 18 கிலோ கொண்ட கட்டியை அகற்றி டாக்டர்கள் சாதனை படைத்துள்ளனர்.

மதுரை காளவாசல் தேவகி புற்றுநோய் ஆஸ்பத்திரிக்கு கடந்த சில தினங்களுக்கு முன்பு வயிற்று வலியால் அவதிப்பட்ட பரிமளா (37) என்ற பெண் சிகிசைக்காக வந்தார். அவரை டாக்டர்கள் தீவிர சோதனை செய்த பின்பு சிகிச்சைக்கு அனுமதிக்கப்பட்டார்.

சோதனையில், அந்த பெண்ணிற்கு வயிற்றில் புற்றுநோய் கட்டி இருப்பது தெரிய வந்தது. இதனையடுத்து, அந்த பெண்ணிற்கு வயிற்றில் உள்ள கட்டியை அகற்ற டாக்டர் நாகேந்திரன் தலைமையில் டாக்டர்கள் ராஜாராம், சந்திரசேகர், ரமேஷ் ஆகியோர் டாக்டர்கள் தீவிர முயற்சி மேற்கொண்டு, ஆபரேஷன் செய்து அவரது வயிற்றில் இருந்த 18 கிலோ எடை கொண்ட கட்டியை அகற்றினர். தற்போது பரிமாளா நலமாக உள்ளார்.

பெண்கள் தங்கள் உடல் நலனை குறிப்பிட்ட காலத்தில் டாக்டர்களிடம் சென்று சோதனை செய்து கொண்டால், நோய் இருக்கும் பட்சத்தில் ஆரம்ப கட்டத்திலேயே குணப்படுத்தி விடலாம் என்று டாக்டர்கள் தெரிவித்தனர்.