குண்டாறு அணை பூங்காவில் ஆபாச பெண் சிலை - முகம் சுளிக்கும் சுற்றுலா பயணிகள்

செங்கோட்டை: குண்டாறு அணைப் பூங்காவில் அமைக்கப்பட்டுள்ள தாய், சேய் ஆபாச உருவ பொம்மை உல்லாச பயணிகளை முகம் சுளிக்க வைத்துள்ளது.

திருநெல்வேலி மாவட்டம் என்றாலே அகஸ்தியர் அருவி, மணிமுத்தாறு நீர்த்தேக்கம், கரையாறு, முண்டந்துறை, களக்காடு, கிருஷ்ணாபுரம், நெல்லையப்பர் கோவில், கூந்தன்குளம், குற்றாலம், ஐந்தருவி, பழைய குற்றால அருவி, ஏராளமான சுற்றுலா பகுதிகள் உள்ளன. இதில் ஓன்று செங்கோட்டை அருகேயுள்ள கண்ணுபுளிமெட்டு குண்டாறு நீர்த்தேக்கம்.

இந்த பகுதி 1998ம் ஆண்டு தமிழக சுற்றுலா தலத்தின் கட்டுபாட்டிற்குள் கொண்டு வர முயற்சிகள் நடந்தன. ஆனால் அதில் தாமதம் ஏற்பட்டதை தொடர்ந்து மாவட்ட நிர்வாகம் சுமார் 25 லட்சம் ரூபாய் செலவில் அழகான பூங்கா ஒன்றை அமைத்தது.

பொதுப்பணித்துறை கட்டுபாட்டிலுள்ள இப்பகுதியில் சுமார் 3 ஏக்கர் பரப்பரளவில் பூங்கா அமைக்கும் பணி நடைபெறவுள்ளது. சில ஆண்டு வரை செயல்பட்ட பூங்கா பின் பராமரிப்பின்றி பாழடைந்த நிலைக்கு தள்ளப்பட்டு தற்போது அரசு நிதி மூலம் புணரமைப்பு பணி நடந்து வருகிறது. ஆண்டுதோறும் குற்றால சீசனுக்கு வரும் பல்லாயிரக்கணக்கான உல்லாச பயணிகள் இப்பகுதிக்கு வருவதால் வருமானத்தை ஈட்டும் வகையில் இப்பகுதி புணரமைக்கப்படுகிறது.

இந்த குண்டாறு நீர்த்தேக்க சிறுவர் பூங்காவில் யானை, டைனோசர் உள்ளிட்ட பல்வேறு உருவ பொம்மைகள் அமைக்கப்பட்டுள்ளது. அதில் ஒன்று சிப்பிக்குள் தாயும், சேயும் இருப்பது போன்று கலைநயத்தோடு அமைக்கப்பட்ட சிலை.

இச்சிலையை தற்போது மிகவும் ஆபாசத்தோடு வர்ணம் பூசியுள்ளதால் முக்கால் அளவு நிர்வணத்தோடு அப்பெண் தன் குழந்தையோடு படுத்திருப்பது போன்று உள்ளது. இதனை குழந்தைகளோடு சென்று பார்வையிடும் பொதுமக்கள், உல்லாச பயணிகள் கலை நயம் இருந்தாலும் முகம் சுளிக்கும் விதமாக இருப்பதாக கூறுகின்றனர்.

சிறுவர் பூங்காவில் சிந்தை மயக்கும் சிற்பம் மீது பூசப்பட்ட வர்ணம் சீரமைக்கப்பட வேண்டும் என்றும் அவர்கள் கூறுகின்றனர்.