ரஹ்மானின் செம்மொழிப் பாடலுக்கு மே மாதம் படப்பிடிப்பு!

பக்கிம் சந்திர சட்டர்ஜியின் வந்தே மாதரம் பாடலுக்கு ரஹ்மான் போட்ட அபார மெட்டு மாதிரி, புதிய தமிழ்த்தாய் வாழ்த்து ஒன்றை உலகத் தமிழ் செம்மொழி மாநாட்டுக்காக உருவாக்க வேண்டும் என்பது முதல்வர் கருணாநிதியின் தீராத ஆசை.

அந்த ஆசைக்கு இதோ இசை வடிவம் கொடுத்துவிட்டார் ரஹ்மான். பாடலை முதல்வர் கருணாநிதியே இயற்றியிருந்தார்.

பாடலைக் கேட்ட கனிமொழி எம்பி, கவிஞர் வைரமுத்து ஆகியோர் பெரிதும் பாராட்டியதை ஏற்கெனவே தெரிவித்திருந்தோம்.

இந்தப் பாடலின் இறுதி வடிவம் முதல்வரிடம் காட்டப்பட அவரும் வெகுவாகப் பாராட்டியுள்ளார்.

சங்கத் தமிழர் வரலாற்றை விவரிக்கும் வகையில் உள்ள இந்த பாடலுக்கான படப்பிடிப்பு தற்போது நடந்து வருகிறது. கனிமொழி எம்.பி. மேற்பார்வையில் இந்தப் பணிகள் நடந்து வருகின்றன. இந்தப் பாடலை முதலில் ஷங்கர் இயக்குவார் என்று கூறியிருந்தார்கள்.

இப் படப்பிடிப்பு முடிந்தவுடன் முதல்வர் கருணாநிதி தலைமையில் மே மாதம் மத்தியில் நடைபெற உள்ள பிரமாண்ட நிகழ்ச்சியில் இப் பாடல் குறுந்தகடு வெளியிடப்படுகிறது.

தமிழகத்தில் உள்ள அனைத்து திரையரங்குகளிலும் இந்த குறுந்தகடு திரையிடப்படும். அதேபோல தமிழக அரசின் செய்தித் துறை சார்பில் கிராமங்கள்தோறும் திரையிட ஏற்பாடு செய்யப்பட்டு வருகிறது.