திருப்பதி லட்டை வாங்கும்போதே எடை போட்டுப் பார்க்கலாம்!

திருமலை: திருப்பதி திருமலை ஏழுமலையான் கோவிலில் வழங்கப்படும் லட்டு பிரசாதத்தின் எடை சரியாக உள்ளதா என்பதை இனி லட்டு கவுன்டர்களிலேயே எடை பார்த்துக் கொள்ளலாம்.

திருப்பதி ஏழுமலையான் லட்டுப் பிரசாதத்துக்கு ஏக கிராக்கி. எவ்வளவு விலை என்றாலும் வாங்க தயாராக மக்கள் வரிசையி்ல் நாள்கணக்கில் காத்திருக்கின்றனர். ஆனால் லட்டு தரமானதாக இல்லை என்றும் எடை மிகவும் குறைவாக இருப்பதாகவும் பக்தர்கள் புகார் கூறினார்கள்.

இதையடுத்து சரியான எடையில் பக்தர்களுக்கு லட்டு வழங்க தேவஸ்தானம் முடிவு செய்தது. இதன்படி லட்டு அனைத்தும் உரிய முறையில் எடை போடப்பட்டு தயாரிக்கப் படுகிறது. இந்த லட்டுகளின் எடை சரியாக இருக்கிறதா? என்பதை கண்டறிய கவுன்டர்கள் எதிரே எலெக்ட்ரானிக் தராசுகள் அமைக்க அதிகாரிகள் திட்டமிட்டுள்ளனர். அடுத்த இரு வாரங்களுக்குள் தராசுகள் வைக்கப்பட்டுவிடும்.