தமிழ் செம்மொழி மாநாடு- கல்லூரி மாணவர்களுக்கான போட்டி - அமைச்சர் பூங்கோதை அறிவிப்பு

கோவை: உலக தமிழ் செம்மொழி மாநாட்டையொட்டி, தமிழ் விக்கிபீடியா இணையதளத்துக்கு கட்டுரை அளிக்கும் போட்டியில், மருத்துவம், பொறியியல், வேளாண்மை, கால்நடை அறிவியல், கலை அறிவியல், சட்டம் என 7 துறைகளைச் சேர்ந்த பல்கலைக்கழக மாணவர்கள் தாங்கள் வழங்கும் கட்டுரைகளுக்கு பரிசு வழங்கப்படும் என அமைச்சர் பூங்கோதை தெரிவித்துள்ளார்.

இது குறித்து தகவல் தொழில்நுட்பத் துறை அமைச்சர் பூங்கோதை கூறுகையில்,

'பள்ளி மாணவர்களுக்காக நடத்தப்பட்ட கணினித் தமிழ் வரைகலை போட்டிகளில் சிறந்த மாணவர்கள், சிறந்த பள்ளிகளை தேர்வுக் குழுவினர் தேர்வு செய்துள்ளனர். இது பற்றிய அறிவிப்பு விரைவில் வெளி வரும்.

அடுத்து கல்லூரி மாணவர்களுக்கான விக்கிபீடியா தமிழ் இணையதளத்துக்கு கட்டுரை அளிக்கும் போட்டி நடத்தப்பட உள்ளது.

தமிழ் மொழியைவிட குறைந்த அளவிலே பேசப்படும் ஸ்பானிஷ் மொழியில் விக்கிபீடியா இணையதளத்தில் ஏராளமான கட்டுரைகள் உள்ளன. அதே போன்று, சீன மொழியில் 2 லட்சம் கட்டுரைகள் உள்ளது.

ஆனால், தமிழ் மொழியில் சுமார் 19 ஆயிரம் கட்டுரைகளே உள்ளன. இதை அதிகரிக்கும் வகையில் இந்தப் போட்டி நடைபெற உள்ளது.

மருத்துவம், பொறியியல், வேளாண்மை, கால்நடை அறிவியல், கலை அறிவியல், சட்டம் என 7 துறை சார்ந்த பல்கலைக்கழகங்களில் இருந்து மாணவர்கள் பங்கேற்கலாம். அவர்கள் தங்கள்துறை சார்ந்த கட்டுரைகளை அளிக்கலாம்.

போட்டியில் பங்கேற்க விரும்பும் மாணவர்கள் மார்ச் 15ம் தேதி முதல் இணையதளத்தில் பதிவு செய்து கொள்ளலாம். ஏப்ரல் 30 ம் தேதி வரை கட்டுரைகளை அளிக்கலாம்.

சிறந்த கட்டுரைகளை அளிக்கும் கல்லூரி மாணவர்களுக்கு பரிசுகள் வழங்கப்படும்' என்றார்.