450 கோடி ஆண்டுக்கு முன்பு சந்திரனும், பூமியும் மோதி தண்ணீர் உருவானதாமே.. தெரியுமா உங்களுக்கு...??

By Mayura Akilan

Updated: Monday, May 13, 2013, 19:03 [IST]

Subscribe to Oneindia Tamil

பூலோகத்தில் வரப்போகிற தண்ணீர் பஞ்சத்திற்கு செவ்வாய் கிரகத்திலோ, சந்திரனிலோ போய் குடியேறிவிடலாமா என்று யோசித்து வரும் இந்த நேரத்தில் சந்திரனில் தண்ணீர் இருப்பது கண்டுபிடிக்கப்பட்டுள்ளது.

சந்திரனில் தண்ணீர் துகள்கள் உருவாகுவதற்கான சாத்திய கூறுகள் குறித்து அமெரிக்காவின் பிரவுன் பல்கலைக்கழக மண்ணியல் துறையினர் ஆய்வு மேற்கொண்டனர். அங்குள்ள பாறைத்துகள்களில் தண்ணீர் மூலக்கூறுகள் இருப்பதை கண்டறிந்துள்ளனர் ஆய்வாளர்கள்.

அப்பல்லோ ஓடம்

அப்பல்லோ விண்வெளி ஓடம் 71, 72ம் ஆண்டு சந்திரனுக்குச் சென்று சில பாறை துகள்களை சேகரித்து வந்தது. இந்த மண் மற்றும் பாறைகளை பேராசிரியர் அல்பெர்டோ சால் தலைமையிலான குழுவினர் ஆராய்ச்சி செய்தனர்.

சந்திரனும், பூமியும்

அதில் கடந்த 450 கோடி ஆண்டுகளுக்கு முன்பு பூமியும், சந்திரனும் ஒன்றுக்கொன்று மோதின. அப்போது பூமியில் இருந்த தண்ணீர் மற்றும் அதன் துகள்கள் சந்திரனுக்கு இடம் மாறியிருக்க வேண்டும்.

எரிமலைத் துகள்கள்

கடந்த 2011-ம் ஆண்டு நடத்திய ஆய்வில் பூமியில் உள்ள எரிமலையின் குழம்பு துகள்களும் சந்திரனின் மண்ணிலும் உள்ளன என்பது தெரியவந்துள்ளது. பூமியின் எரிமலைகளில் இருக்கும் 'ஒலிவின்' என்ற துகள்கள் சந்திரனில் இருந்து எடுத்து வரப்பட்ட மண்ணில் உள்ளன.

இடம்மாறிய தண்ணீர்

இவை தவிர ஹைட்ரஜனின் 'டியட்டோரியம்' என்ற ஐசோடோப் சந்திரனில் உள்ள மண்ணில் உள்ளது. இது பூமியின் மண்ணில் உள்ளது போன்றே உள்ளது. எனவே சந்திரன் மீது பூமி மிக கடுமையாக மோதியதில் தண்ணீர் இடமாறி அங்கு தண்ணீர் துகள் உருவாகி இருக்கலாம் என விஞ்ஞானிகள் தெரிவித்துள்ளனர்.