சுண்டி எறிந்த நிலவு ...

-அறிவு

கண் விழித்துப் பார்த்தேன்
விடிந்து வெகு நேரம் ஆயிருந்தது.

கண்ணில் 'கட்டிங்' கலங்கல்;
போர்வையை நீக்கி விட்டு
தரையில் கால் பதித்து
ஜன்னல் வழியே
அறைக்குள் அத்துமீறி வந்த
சூரியனைப் பார்த்தேன்.
சூடான சூரியன்!

வெளிச்சப் பூவை மொய்த்தது நினைவு வண்டு;
இதே சூரியனைத்தான்,
எனது கண்கள் என்றாள் அவள்!

அப்படியே பகலவனின் தேஜஸ் என்றாள்;
புளகாங்கிதமடைந்தேன்!

வானத்தைப் போல விசால மனசு என்றாள்;
மயங்கிக் கிடந்தேன்!

என்னவெல்லாமோ சொன்னாள்,
எல்லாமே மனதிலேயே இருக்கிறது!
அவள்தான் என்னிடம் இல்லை.
எல்லாவற்றையும் சொல்லி விட்டு
எங்கேயோ போய் விட்டாள்.

என்னை சுண்டி எறிந்து விட்ட
அந்த நிலவை விட,
சுட்டெரித்த இந்த சூரியன்
குளிர்ச்சியாக தெரிந்தது!

எழுந்து நின்று
நெருப்புக் கடவுளை ரசித்தேன் - சந்தோஷமாக!

-அறிவு ([email protected])