மகாபலிபுரம் டூ எண்ணூர்.. இந்தியாவின் மிக முக்கிய ரோடு.. மின்னல் வேகத்தில் தயார் ஆகும் 10 வழிச் சாலை

சென்னை: "இனி டிராஃபிக் ஜாம் தலைவலி இருக்காது!" - சென்னைவாசிகளின் நீண்ட நாள் கனவான சென்னை பெரிபெரல் ரிங் ரோடு (CPRR) பணிகள் தற்போது ஜெட் வேகத்தில் நடந்து வருகின்றன.

தமிழக நெடுஞ்சாலைத் துறையின் முதல் 'அக்ஸஸ் கன்ட்ரோல்டு' (Access-Controlled) விரைவுச் சாலையாக உருவெடுத்து வரும் இந்தத் திட்டம், சென்னையின் போக்குவரத்து முகத்தையே மாற்றப்போகிறது.

என்ன நடக்கிறது களத்தில்?

சுமார் 133 கிலோமீட்டர் நீளம் கொண்ட இந்த பிரம்மாண்ட சாலை, மாமல்லபுரம் அருகே உள்ள பூஞ்சேரியில் தொடங்கி காட்டுப்பள்ளித் துறைமுகம் வரை நீள்கிறது. சமீபத்திய அப்டேட்டின் படி, ஒட்டுமொத்தப் பணிகளில் பெரும் பகுதி நிறைவடைந்துள்ளது.

சிங்கப்பெருமாள் கோவில் - ஸ்ரீபெரும்புதூர்: இந்தப் பகுதியில் பெரும்பாலான பணிகள் முடிந்துவிட்டன. இப்போது சர்வீஸ் சாலைகள் மற்றும் சிறிய மேம்பாலப் பணிகள் மட்டுமே பாக்கி.

தச்சூர் - எண்ணூர் (பிரிவு 1): மின்சார டவர்கள் மற்றும் நீர்நிலைகளைக் கடக்கும் சவாலான பணிகளும் இப்போது இறுதி கட்டத்தை எட்டியுள்ளன.

ஸ்ரீபெரும்புதூர் - திருவள்ளூர்: எல் அண்ட் டி (L&T) போன்ற நிறுவனங்கள் தங்களுக்கு ஒதுக்கப்பட்ட பணிகளில் 80 சதவீதத்திற்கும் மேல் முடித்துவிட்டன.

'அக்ஸஸ் கன்ட்ரோல்டு' சாலை

'அக்ஸஸ் கன்ட்ரோல்டு' (Access-Controlled) அல்லது 'கட்டுப்படுத்தப்பட்ட அணுகல்' கொண்ட சாலை என்பது சாதாரண சாலைகளைப் போல அல்லாமல், ஒரு குறிப்பிட்ட வடிவமைப்புடன் உருவாக்கப்பட்ட அதிவேக நெடுஞ்சாலை ஆகும். எளிமையாகச் சொன்னால், இந்தச் சாலையில் நீங்கள் நினைத்த இடத்தில் எல்லாம் உள்ளே நுழையவோ அல்லது வெளியேறவோ முடியாது. சாதாரண சாலைகளில் தெருக்களும், சந்துகளும் குறுக்கிடும், ஆனால் அக்ஸஸ் கன்ட்ரோல்டு சாலையில் குறுக்கே எந்தப் பாதையும் இருக்காது; இதற்காக மேம்பாலங்கள் அல்லது அண்டர்-பாஸ்கள் (Underpasses) கட்டப்பட்டிருக்கும்.

குறிப்பிட்ட இடைவெளியில் அமைக்கப்பட்டுள்ள 'இன்டர்சேஞ்ச்' (Interchange) எனப்படும் நுழைவு மற்றும் வெளியேறும் பாதைகள் வழியாக மட்டுமே இந்தச் சாலைக்குள் நுழைய முடியும். இதனால் எதிரே வரும் வாகனங்களோ, குறுக்கே வரும் பாதசாரிகளோ அல்லது கால்நடைகளோ இருக்காது என்பதால், விபத்துகள் பெருமளவு குறைக்கப்படுகின்றன.

மேலும், போக்குவரத்து நெரிசல் இல்லாமல் வாகனங்கள் மணிக்கு 100 முதல் 120 கிலோமீட்டர் வேகத்தில் தடையின்றிச் செல்ல முடியும். இத்தகைய சாலைகளின் இருபுறமும் வேலிகள் அல்லது தடுப்புச் சுவர்கள் அமைக்கப்பட்டிருக்கும், இதனால் உள்ளூர் போக்குவரத்து மற்றும் அதிவேகப் போக்குவரத்து என இரண்டும் தனித்தனியாகப் பிரிக்கப்பட்டு, பயண நேரம் பாதியாகக் குறைகிறது.

சிறப்பம்சங்கள்: 120 கி.மீ வேகத்தில் பறக்கலாம்!

இந்தச் சாலை சாதாரணச் சாலை அல்ல. இந்தியாவின் மிக அகலமான சாலைகளில் ஒன்று.

10 வழிப் பாதை: 6 பிரதான வழித்தடங்கள் (விரைவுப் பயணம்) மற்றும் இருபுறமும் தலா 2 சர்வீஸ் சாலைகள்.

வேகக் கட்டுப்பாடு: மணிக்கு 120 கி.மீ வேகத்தில் செல்லும் வகையில் இது வடிவமைக்கப்பட்டுள்ளது.

ஸ்மார்ட் ரோடு: விபத்துகளைத் தவிர்க்கவும், போக்குவரத்தைச் சீரமைக்கவும் 'இன்டெலிஜென்ட் டிரான்ஸ்போர்ட் சிஸ்டம்' (ITS) மற்றும் சிசிடிவி கேமராக்கள் பொருத்தப்பட உள்ளன.

"எண்ணூரில் இருந்து மாமல்லபுரத்திற்கு இப்போது 3 மணி நேரம் ஆகிறது. இந்தச் சாலை முழுமையாகத் திறக்கப்பட்டால், வெறும் 60 முதல் 70 நிமிடங்களில் போய்விடலாம்!" என உற்சாகமாகத் தெரிவிக்கிறார்கள் அதிகாரிகள்.

ரியல் எஸ்டேட் 'எகிறும்' விலை!

இந்தச் சாலை செல்லும் பாதையில் உள்ள திருவள்ளூர், திருபெரும்புதூர், சிங்கப்பெருமாள் கோவில் ஆகிய பகுதிகளில் நிலத்தின் மதிப்பு பல மடங்கு உயர்ந்துள்ளது. தொழிற்சாலைகள் மற்றும் அடுக்குமாடி குடியிருப்புகள் வரத் தொடங்கியுள்ளதால், இந்தப் பகுதிகள் சென்னையின் புதிய 'ஹப்'-ஆக மாறி வருகின்றன.

எப்போது பயன்பாட்டுக்கு வரும்?

தற்போதைய வேகத்தைப் பார்த்தால், 2026-ன் இறுதிக்குள் அல்லது 2027-ன் தொடக்கத்தில் முழு சாலையும் வாகனப் போக்குவரத்திற்குத் தயாராகிவிடும் என எதிர்பார்க்கப்படுகிறது.

இந்தச் சாலைக்காக நிலம் கொடுத்தவர்களுக்கு வழங்கப்பட்ட நஷ்டஈடு மற்றும் நிலம் கையகப்படுத்தும் பணிகள் கிட்டத்தட்ட 100% முடிந்துவிட்டன. இனி தார் சாலை அமைப்பதும், பெயிண்ட் அடிப்பதும் மட்டும்தான் பாக்கி!

English summary

Chennai Peripheral Ring Road (CPRR) 2026 Update: Construction Enters Final Phase