பெட்ரோல், டீசல் மற்றும் எல்.பி.ஜி.. எல்லாமே அடுத்தடுத்து உயருகிறதே.. இனி கட்டுப்படுத்தவே முடியாது!
சென்னை: மத்திய கிழக்கு நாடுகளில் நிலவி வரும் தீவிரமான போர்ச் சூழல் மற்றும் உலகளாவிய கச்சா எண்ணெய் சப்ளை முடக்கம் காரணமாக, இந்திய சந்தையில் கடந்த ஒரு மாதத்தில் எரிபொருட்களின் விலை முன்னெப்போதும் இல்லாத வகையில் புதிய உச்சத்தைத் தொட்டுள்ளது.
பொதுமக்களின் மாதாந்திர பட்ஜெட்டையே தலைகீழாக மாற்றியுள்ள இந்த அதிரடி விலையேற்றங்களின் முழுமையான காலவரிசை மற்றும் வரலாற்றுப் பின்னணியை இங்கு விரிவாகக் காண்போம்.
பெட்ரோல் மற்றும் டீசல் விலை உயர்வு வரலாறு (கடந்த 15 நாட்களில் 4 முறை)
கடந்த சில மாதங்களாகத் தேர்தல் மற்றும் பல்வேறு காரணங்களால் எவ்வித மாற்றமும் இன்றி நீடித்து வந்த பெட்ரோல், டீசல் விலைகள், தேர்தலுக்கு பின்பாக.. மே 15 முதல் திடீரென அதிரடியாக உயர்த்தப்படத் தொடங்கின. கடந்த இரு வாரங்களில் மட்டும் நான்கு கட்டங்களாக இந்த விலையேற்றம் நுகர்வோர் மீது திணிக்கப்பட்டுள்ளது.
மே 15, 2026 - முதல் கட்ட விலையேற்றம்: நீண்ட இடைவெளிக்குப் பிறகு பொதுத்துறை எண்ணெய் நிறுவனங்கள் எரிபொருள் விலையை உயர்த்தத் தொடங்கின. முதல் தவணையாகவே பெட்ரோல் மற்றும் டீசல் விலை லிட்டருக்கு அதிரடியாக ரூ.3.00 உயர்த்தப்பட்டு நுகர்வோருக்கு அதிர்ச்சி அளிக்கப்பட்டது.
மே 19, 2026 - இரண்டாம் கட்ட உயர்வு: முதல் உயர்வு தந்த அதிர்ச்சி விலகுவதற்குள், அடுத்த நான்கே நாட்களில் மீண்டும் பெட்ரோல் மற்றும் டீசல் விலை லிட்டருக்கு தலா 90 காசுகள் உயர்த்தப்பட்டது.
மே 23, 2026 - மூன்றாம் கட்ட உயர்வு: சர்வதேச சந்தையின் அழுத்தத்தைக் காரணம் காட்டி, மே 23 அன்று பெட்ரோல் விலை லிட்டருக்கு 87 காசுகளும், டீசல் விலை லிட்டருக்கு 91 காசுகளும் அதிகரிக்கப்பட்டன. இதே நாளில் டெல்லியில் சி.என்.ஜி (CNG) எரிவாயு விலையும் கிலோவுக்கு 1 ரூபாய் உயர்த்தப்பட்டது.
மே 25, 2026 (இன்று) - நான்காம் கட்ட அதிரடி உயர்வு: கடந்த இரு வாரங்களில் இல்லாத அளவுக்கு இன்று மிகக் கடுமையான விலையேற்றம் அறிவிக்கப்பட்டுள்ளது. இதன்படி பெட்ரோல் விலை லிட்டருக்கு ரூ.2.46 மற்றும் டீசல் விலை லிட்டருக்கு ரூ.2.57 என மிகக் கொடூரமாக உயர்த்தப்பட்டுள்ளது.
கடந்த 10 முதல் 12 நாட்களுக்குள் மட்டும், நாட்டில் பெட்ரோல் மற்றும் டீசலின் சில்லறை விற்பனை விலை ஒட்டுமொத்தமாக தோராயமாக ரூ.7.50 காசுகள் வரை அதிகரித்துள்ளது. இதன் மூலம் சென்னையில் இன்று ஒரு லிட்டர் பெட்ரோல் ரூ.107.77 ஆகவும், டீசல் ரூ.99.55 ஆகவும் விற்பனையாகிறது.
எல்.பி.ஜி (LPG) சிலிண்டர் விலையேற்ற வரலாறு (கடந்த 1 மாதத்தில் வரலாறு காணாத உயர்வு)
மறுபுறம், சமையல் எரிவாயு விலையும் கடந்த மார்ச் மற்றும் ஏப்ரல் மாதங்களைத் தொடர்ந்து மே 1 அன்றும் வரலாறு காணாத அளவிற்கு உயர்த்தப்பட்டு, ஒட்டுமொத்த வணிகத் துறையையும் நிலைகுலையச் செய்துள்ளது.
வணிகப் பயன்பாட்டு சிலிண்டர் (19 கிலோ) - மே 1, 2026: இந்தியாவின் வரலாற்றிலேயே இல்லாத வகையில், மே 1 அன்று ஒரே மாதத்தில் மட்டும் 19 கிலோ வணிக சிலிண்டரின் விலை மிகக் கொடூரமாக ரூ.993 முதல் ரூ.1,147 வரை (நகரங்களைப் பொறுத்து) உயர்த்தப்பட்டது.
சென்னையில் புதிய உச்சம்: சென்னையில் கடந்த ஏப்ரல் மாதம் ரூ.2,246.50 ஆக இருந்த வணிக சிலிண்டரின் விலை, மே 1 அன்று ஒரே நாளில் ரூ.1,013 உயர்த்தப்பட்டு, தற்போது ரூ.3,259.50 என்ற இமாலய விலைக்கு விற்பனையாகிறது.
முந்தைய மாதங்களின் தொடர்ச்சி: மார்ச் மாதத்தில் ரூ.144 உயர்வு, ஏப்ரல் 1 அன்று சுமார் ரூ.200 உயர்வு எனத் தொடர்ந்து, மே மாதத்தின் இந்த ரூ.1,000+ விலையேற்றமும் சேர்ந்து ஒட்டுமொத்தமாக மூன்று மாதங்களில் மட்டும் வணிக சிலிண்டர் விலை ரூ.1,350-க்கும் மேல் அதிகரித்துள்ளது.
வீட்டு உபயோக சிலிண்டர் (14.2 கிலோ): சாமானிய மக்களுக்கு ஓரளவுக்கு ஆறுதலாக, வீட்டு உபயோக சிலிண்டர்களின் விலையில் மே மாதத்தில் எண்ணெய் நிறுவனங்கள் மாற்றம் செய்யவில்லை. முன்னதாக மார்ச் மாதத்தில் மட்டும் இதன் விலை ரூ.60 உயர்த்தப்பட்டு, தற்போது சென்னையில் ரூ.928.50 ஆகத் தொடர்கிறது.
சிறிய சிலிண்டர்கள் (5 கிலோ): கூலித் தொழிலாளர்கள் மற்றும் புலம் பெயர் தொழிலாளர்கள் பயன்படுத்தும் 5 கிலோ எடையுள்ள சிறிய சிலிண்டர்களின் விலை மே 1 முதல் ஒரே அடியாக ரூ.261 உயர்த்தப்பட்டுள்ளது.
ஹார்முஸ் நீரிணை (Strait of Hormuz) பகுதியில் நிலவும் போர்ச் சூழலால் இந்தியாவின் 88 சதவீத எல்.பி.ஜி இறக்குமதி பாதிக்கப்பட்டுள்ளது. இந்தத் தொடர் விலையேற்றங்களால் ஹோட்டல்கள், டீக்கடைகள் மற்றும் சிறு வணிகங்கள் தங்களின் உணவுப் பண்டங்களின் விலையை உயர்த்தத் தொடங்கியுள்ளன.
அதே நேரத்தில், டீசல் விலை 100 ரூபாயை நெருங்கியுள்ளதால் லாரி வாடகைகள் உயர்ந்து, அடுத்த சில நாட்களில் காய்கறி உள்ளிட்ட அத்தியாவசியப் பொருட்களின் விலையும் கிடுகிடுவென உயரும் அபாயம் ஏற்பட்டுள்ளது.
Click it and Unblock the Notifications
Sign in with Google