வந்த 2 நாளில்.. தட்டி தூக்கிடிச்சே.. ஃபாஸ்டேக் வருடாந்திர பாஸ்.. வாகன ஓட்டிகளுக்கு தந்த சர்ப்ரைஸ்!
சென்னை: தேசிய நெடுஞ்சாலைகள் ஆணையம் (NHAI) நாடு முழுவதும் உள்ள தேசிய நெடுஞ்சாலைகள் மற்றும் விரைவுச் சாலைகளில் சுமார் 1,150 சுங்கச்சாவடிகளில் ஃபாஸ்டேக் ஆண்டு பாஸ் வசதியை வெற்றிகரமாகச் செயல்படுத்தியுள்ளது. இத்திட்டத்திற்கு தேசிய நெடுஞ்சாலைப் பயணிகளிடமிருந்து பெரும் வரவேற்பு கிடைத்துள்ளதாக சாலைப் போக்குவரத்து மற்றும் நெடுஞ்சாலைகள் அமைச்சகம் தெரிவித்துள்ளது.
திட்டத்தின் முதல் நாளான ஆகஸ்ட் 15 அன்று மாலை 7 மணி வரை, சுமார் 1.4 லட்சம் பயனர்கள் ஆண்டு பாஸை வாங்கிப் பயன்படுத்தத் தொடங்கியுள்ளனர். மேலும், சுங்கச்சாவடிகளில் 1.39 லட்சம் பரிவர்த்தனைகள் பதிவாகியுள்ளன.
ஃபாஸ்டேக் - வருடாந்திர பாஸ்
ஒரே நேரத்தில் 20,000 முதல் 25,000 பயனர்கள் ராஜ்மார்க்யாத்ரா செயலியைப் பயன்படுத்தி வருகின்றனர். பாஸ் பயனர்களுக்கு சுங்கக் கட்டணம் கழிக்கப்படாதது குறித்த குறுஞ்செய்திகள் வந்து சேர்கின்றன என்று NHAI தெரிவித்துள்ளது.
"பாஸ் பயனர்களுக்குத் தடையற்ற பயண அனுபவத்தை உறுதிப்படுத்த, ஒவ்வொரு சுங்கச்சாவடியிலும் NHAI அதிகாரிகள் மற்றும் நோடல் அதிகாரிகள் நியமிக்கப்பட்டுள்ளனர். பல்வேறு வழிகளில் பயனர்களின் சந்தேகங்களுக்கு NHAI பதிலளித்து வருகிறது. மேலும், குறைகளைத் தீர்க்க, 1033 தேசிய நெடுஞ்சாலை உதவி எண், 100-க்கும் மேற்பட்ட நிர்வாகிகளைச் சேர்த்து வலுப்படுத்தப்பட்டுள்ளது," என்று தேசிய நெடுஞ்சாலைகள் ஆணையம் கூறியது.
ஃபாஸ்டேக் - வருடாந்திர பாஸ் பெறுவது எப்படி?
தேசிய நெடுஞ்சாலைப் பயணிகளுக்குச் சீரான மற்றும் சிக்கனமான பயண வசதியை ஃபாஸ்டேக் ஆண்டு பாஸ் வழங்குகிறது. ₹3,000 ஒருமுறை கட்டணம் செலுத்தி, ஓர் ஆண்டு செல்லுபடியாகும் அல்லது 200 சுங்கச்சாவடி பயணங்களுக்கு இது கிடைக்கிறது. இதன் மூலம், ஃபாஸ்டேக்கை அடிக்கடி ரீசார்ஜ் செய்ய வேண்டிய அவசியம் தவிர்க்கப்படுகிறது.
செல்லுபடியாகும் ஃபாஸ்டேக் கொண்ட வணிகம் அல்லாத அனைத்து வாகனங்களுக்கும் இந்த ஆண்டு பாஸ் பொருந்தும். ராஜ்மார்க்யாத்ரா செயலி அல்லது NHAI இணையதளம் மூலம் ஒருமுறை கட்டணம் செலுத்திய இரண்டு மணி நேரத்திற்குள் இது செயல்பட்டுவிடும். சுமார் 98 சதவீத பரவலுடன், 8 கோடிக்கும் அதிகமான பயனர்களைக் கொண்டுள்ள ஃபாஸ்டேக், நாட்டின் மின்னணு சுங்கக் கட்டண முறையை மாற்றியமைத்துள்ளது.
ஆண்டு பாஸ் வசதியின் அறிமுகம், ஃபாஸ்டேக் பயன்பாட்டை மேம்படுத்துவதுடன், தேசிய நெடுஞ்சாலைகள் மற்றும் விரைவுச் சாலைகளில் பயணங்களை மேலும் சிக்கனமானதாகவும், தடையற்றதாகவும் மாற்றும் என்று அமைச்சகம் தெரிவித்துள்ளது.
புதிய ஃபாஸ்டேக் ஆண்டு பாஸ் - விண்ணப்பிக்கும் முறை
பயனர்கள் தங்கள் ஃபாஸ்டேக் மூலம் மாநில மற்றும் பிற சுங்கச்சாவடிகளில் கட்டணம் செலுத்த முடியும். ஆனால், ஆண்டு பாஸ் கணக்கிலிருந்து பணம் தேசிய நெடுஞ்சாலை சுங்கச்சாவடிகளுக்கு மட்டுமே பயன்படுத்தப்படும் என்பது குறிப்பிடத்தக்கது.
மத்திய சாலை அமைச்சகம் வெளியிட்ட கேள்வி-பதில் தொகுப்பின்படி, வாகனம் மற்றும் அதனுடன் இணைந்த ஃபாஸ்டேக்கின் தகுதியைச் சரிபார்த்த பின்னரே ஆண்டு பாஸ் செயல்படுத்தப்படும். சரிபார்ப்புக்குப் பிறகு, பயனர் ராஜமார்க்யாத்ரா மொபைல் செயலி அல்லது NHAI இணையதளம் மூலம் 2025-26 அடிப்படை ஆண்டுக்கு ₹3,000 செலுத்த வேண்டும்.
புதிய ஃபாஸ்டேக் ஆண்டு பாஸ் - எப்படி பெறுவது?
மத்திய சாலை போக்குவரத்து மற்றும் நெடுஞ்சாலை அமைச்சகம் சில காலமாக இந்த ஆண்டு பாஸ் அறிமுகம் குறித்துப் பரிசீலித்து வந்தது. தூர அடிப்படையிலான கட்டணங்களை அறிமுகப்படுத்தவும் திட்டமிட்டிருந்தது, ஆனால் அது குறித்து இன்னும் இறுதி முடிவு எடுக்கப்படவில்லை.
ஃபாஸ்டேக் என்பது ரேடியோ அலைவரிசை அடையாள தொழில்நுட்பத்தைப் (RFID) பயன்படுத்தும் ஒரு மின்னணு கட்டண வசூல் அமைப்பு. இது வாகனத்தை நிறுத்தாமல், ப்ரீபெய்ட் அல்லது சேமிப்புக் கணக்கிலிருந்து நேரடியாகக் கட்டணம் செலுத்த உதவுகிறது. ஃபாஸ்டேக் வாகனத்தின் முன்பக்க கண்ணாடியில் ஒட்டப்பட்டிருக்கும்.
Click it and Unblock the Notifications
Sign in with Google