ரூ.3000 FDFS டிக்கெட்… சாமானிய ரசிகனுக்கு “ஜனநாயகன்” தடைபட்ட படமா? விஜய்யின் மௌனம் என்ன அர்த்தம்?

சென்னை: நடிகர் விஜய்யின் கடைசி படம் என அறிவிக்கப்பட்டுள்ள ஜனநாயகன் வெளியாகும் முன்பே, அரசியல் பேசும் கதையை விட, பணம் பேசும் சர்ச்சைகளில் சிக்கி வருகிறது. தணிக்கை சான்றிதழ் சிக்கல் ஒருபுறம் இருக்க, தற்போது முதல் நாள் முதல் காட்சி டிக்கெட் விலை குறித்த தகவல்கள், ரசிகர்களை அதிர்ச்சி அடைய வைத்துள்ளது.

ரூ.3000-க்கு சென்ற பயணம்

ஜனநாயகன் படத்தின் FDFS டிக்கெட்டுகள் சில இடங்களில் ரூ.600, ரூ.800, ரூ.1000 என விற்பனை செய்யப்படுவதாக தகவல்கள் வெளியாகின. விஜய்யின் கடைசி படம் என்பதால், "ஒரு நாள் கஷ்டப்பட்டாலும் பரவாயில்லை" என்று நினைத்த ரசிகர்கள் கூட இருந்தனர்.

ஆனால் தற்போது வெளியாகும் தகவல்களின்படி, சில மாவட்டங்களில் அதே முதல் காட்சி டிக்கெட்டுகள் ரூ.2000 முதல் ரூ.3000 வரை வசூல் செய்யப்படுவதாக குற்றச்சாட்டுகள் எழுந்துள்ளன. இது ரசிகர்களின் பொறுமையையே சோதிக்கும் அளவிற்கு சென்றுள்ளது.

அரசு விலை காகிதத்தில் மட்டும்

சில தியேட்டர்கள் "அரசு நிர்ணயித்த விலைக்கே டிக்கெட் விற்கப்படுகிறது" என்று சமூக வலைத்தளங்களில் விளக்கம் கொடுத்திருந்தாலும், நிஜத்தில் நடப்பது வேறு என்றே ரசிகர்கள் சொல்கிறார்கள்.

தியேட்டர் கவுண்டரில் இல்லை, ஆன்லைனில் இல்லை, ஆனால் பிளாக் மார்க்கெட்டில் டிக்கெட் கிடைக்கிறது. அதில் டிக்கெட் விலை மட்டும் ரூ.3000. இது கருப்பு பணம் இல்லாமல் வேற என்ன? என்ற கேள்வி பலருக்கும் வருகிறது

அரசு நிர்ணயித்த விலையை மீறி டிக்கெட் விற்கப்படுவது சட்டவிரோதம் என்பதே உண்மை. ஆனால் ஜனநாயகன் பெயரில் அது நடக்கும் போது, அதை யாரும் ஊழல் என்று சொல்லத் தயங்குவது ஏன்?

விஜய் அரசியலுக்கு வரப் போகிறார். மக்கள், சாமானியர்கள், ஏழைகள் பற்றி பேசப் போகிறார். ஆனால் அதே மக்களே அவரது கடைசி படத்தை பார்க்க ரூ.3000 கொடுக்க வேண்டும் என்றால், அந்த அரசியல் யாருக்கானது? என்ற கேள்வியும் பலருடைய குமுறலாக இருக்கிறது.

விஜய்யின் மௌனம்

இதுவரை இந்த விவகாரம் குறித்து நடிகர் விஜய் சார்பிலோ, விஜய் மக்கள் இயக்கம் சார்பிலோ எந்த அதிகாரப்பூர்வ விளக்கமும் இல்லை. அதிக விலையில் டிக்கெட் விற்க வேண்டாம் என்று ஒரு வரி கூட விஜய் தரப்பிலிருந்து சொல்ல இல்லை.

இந்த மௌனம், "எப்படி வித்தாலும் பரவாயில்லை, படம் ஓடணும்" என்ற சம்மதமாகவே பார்க்கப்படுகிறதா என்ற கேள்வி எழுகிறது.

சாமானிய ரசிகனின் குமுறல்

பல ஆண்டுகளாக விஜயை தூக்கி நிறுத்தியது மல்டிப்ளெக்ஸ் கூட்டமல்ல. முதல் நாள் முதல் காட்சிக்காக கடன் வாங்கி போன ரசிகர்கள் தான்.

இன்று அந்த ரசிகனுக்கு, "பணம் இருந்தா வா, இல்லன்னா ஒதுங்கு" என்ற மெசேஜ் தான் ஜனநாயகன் தருகிறதா?

வசூல் அரசியல்

ஜனநாயகன் அரசியல் பேசும் படம் என்கிறார்கள். ஆனால் ரிலீசுக்கு முன்பே நடப்பது முழுக்க வசூல் அரசியல். அரசு விலையை மதிக்காத வசூல், அதை பார்த்தும் பேசாத ஹீரோ, கேள்வி கேட்ட ரசிகனை "எதிரி"யாக மாற்றும் சூழல் - இதுதானா புதிய அரசியல்? என்று பலர் சோசியல் மீடியாவில் கேள்வி எழுப்பி வருகின்றனர்.

"விஜயின் கடைசி படம்" என்ற ஒற்றை வரி, எல்லா தவறுகளுக்கும் கவர் நோட்டாக மாறிவிட்டதா? ரூ.3000 டிக்கெட், சட்ட சிக்கல், மறைமுக வசூல் - இதெல்லாம் பேசக்கூடாத விஷயங்களா?

ஜனநாயகன் மக்கள் அரசியல் பேசும் படம் என்றால், முதலில் அந்த மக்களுக்கே அது எட்ட வேண்டாமா? இல்லை, அரசியல் பேசுவது திரையில் மட்டும், வசூல் நடப்பது தரையில் தான் என்றால், ரசிகர்கள் கேள்வி கேட்கத்தான் செய்வார்கள்.

இந்த மௌனம் உடையுமா, இல்லை ரூ.3000 டிக்கெட் தான் "ஜனநாயகன் அரசியல்" என்றே நிலைத்துவிடுமா என்பதே, இப்போது தமிழ் சினிமாவின் பெரிய கேள்வி.

English summary

Jana nayagan: Even before its release, Jananayagan, announced as actor Vijay’s final film, has become embroiled in controversy—not over its political narrative, but over soaring ticket prices. Reports suggest that First Day First Show (FDFS) tickets, initially priced between ₹600 and ₹1000, have allegedly surged to ₹2000–₹3000 in certain districts through black-market channels. While some theatres claim adherence to government-mandated pricing, fans argue that tickets are unavailable at counters or online platforms and are instead sold unofficially at exorbitant rates. This has sparked widespread criticism, especially as Vijay prepares to enter politics championing the cause of the common man. The absence of any official clarification or condemnation from Vijay or Vijay Makkal Iyakkam has further fueled anger, with many interpreting the silence as tacit approval. Longtime fans—who once stood in queues and took loans to watch FDFS shows—now feel excluded, questioning whether Jananayagan’s political message truly represents the people it claims to speak for. The controversy has reignited debates about “collection politics” in Tamil cinema, legality, moral responsibility, and whether the tag “Vijay’s last film” has become a shield for unethical practices.