உலக தங்க வரலாற்றில் இப்படி நடந்தது இல்லை! தங்கத்தை அள்ளிக்குவிக்கும் சீனா.. பின்னணியில் பக்கா பிளான்
நியூயார்க்: தங்கத்தை வாங்கி குவிக்கும் வழக்கத்தை சீனா அதிகப்படுத்தி உள்ளது. அமெரிக்க டாலரைச் சார்ந்திருப்பதைக் குறைக்கும் நோக்கில், சீனா தனது தங்க இருப்புகளை அதிகரிக்கும் கொள்கையைத் தீவிரப்படுத்துவதாலேயே இந்தக் கொள்முதலில் இவ்வளவு பெரிய அதிகரிப்பு ஏற்பட்டுள்ளது. அதிகாரப்பூர்வ தரவுகளில் பதியப்பட்ட கொள்முதல் அளவுகள் பிரமிக்க வைக்கும் நிலையில், உண்மையான தொகை பன்மடங்கு அதிகமாக இருக்கலாம் என்றும் கூறப்படுகிறது.
உலக அளவில் பொருளாதார நிலையற்றத்தன்மை மற்றும் பணவீக்க அச்சங்களுக்கு மத்தியில், தங்கத்தின் மீதான உலகளாவிய தேவை அதிகரித்து வருகிறது. இந்தச் சூழலில், பல்வேறு நாடுகளின் மத்திய வங்கிகள் தங்கள் தங்க இருப்பை கணிசமாக உயர்த்தி வருகின்றன. குறிப்பாக, சீனா மற்றும் இந்தியா ஆகிய நாடுகள் தங்க இருப்பு அதிகரிப்பில் முன்னணியில் இருக்கின்றன. இரண்டு நாடுகளும் தங்கத்தை வாங்கி குவித்து வருகின்றன.
அமெரிக்கா - ஈரான் மோதலால் உலகமே மூன்றாம் உலகப்போர் பீதியில் நடுங்கிக்கொண்டிருக்க, 'டிராகன்' தேசமான சீனாவோ சத்தமில்லாமல் வேறொரு ஆட்டத்தைத் தொடங்கியிருக்கிறது. உலக நாடுகளின் கவனம் போர்முனையில் இருக்க, சீனா தனது பார்வையை 'மஞ்சள் உலோகம்' மற்றும் 'வெள்ளை உலோகம்' பக்கம் திருப்பியுள்ளது.
தங்க வேட்டையில் சீனா!
தங்கம் மற்றும் வெள்ளியை சீனா தற்போது வெறித்தனமாக வாங்கிக் குவித்து வருகிறது. இது வெறும் முதலீடு மட்டுமல்ல; அமெரிக்க டாலரின் ஆதிக்கத்திற்கு விடப்பட்டிருக்கும் நேரடி சவால் என்கிறார்கள் பொருளாதார நிபுணர்கள்.
ஈரான் - அமெரிக்கா போர் சூழலால் உலகளாவிய விநியோகச் சங்கிலி (Supply Chain) பாதிக்கப்படலாம், டாலரின் மதிப்பு நிலைகுலையலாம் என எதிர்பார்க்கப்படுகிறது. இத்தகைய இக்கட்டான சூழலில், தனது பொருளாதாரத்தைப் பாதுகாப்பாக வைத்திருக்க சீனா தனது அந்நியச் செலாவணி இருப்பில் தங்கத்தின் அளவை மின்னல் வேகத்தில் உயர்த்தி வருகிறது. இதன் மூலம் தனது நாணயமான 'யுவானை' (Yuan) பலப்படுத்த சீனா திட்டமிடுகிறது.
வெள்ளியிலும் ஒரு ரகசிய கணக்கு!
சீனா தங்கத்தை மட்டும் குறிவைக்கவில்லை; வெள்ளியையும் டன் கணக்கில் பதுக்கி வருகிறது. இதற்குப் பின்னால் ஒரு தீர்க்கதரிசனமான தொழில்நுட்பக் கணக்கு இருக்கிறது. வெள்ளி என்பது வெறும் ஆபரணம் மட்டுமல்ல:
சோலார் பேனல்கள்
மின்சார வாகனங்கள் (EV)
செமிகண்டக்டர் சிப் தயாரிப்பு
ஆகிய எதிர்காலத் தொழில்நுட்பங்களுக்கு வெள்ளி மிக அத்தியாவசியமானது. வரும் காலங்களில் தொழில்நுட்ப சந்தையைத் தனது முழுக் கட்டுப்பாட்டிற்குள் கொண்டு வர இப்போதே வெள்ளியைச் சீனா கையிருப்பில் வைக்கத் தொடங்கியுள்ளது.
ரஷ்யா கொடுத்த பாடம்!
ரஷ்யா - உக்ரைன் போரின்போது அமெரிக்கா விதித்த பொருளாதாரத் தடைகளால் ரஷ்யா கடும் நெருக்கடியைச் சந்தித்தது. அதைப் பார்த்த சீனா உஷாராகிவிட்டது. தன் நாட்டுப் பணத்தை டாலராகச் சேமித்து வைத்தால், எதிர்காலத்தில் அமெரிக்காவுடன் மோதல் ஏற்படும்போது அது தனக்கே வினையாக முடியும் என்பதைச் சீனா உணர்ந்துள்ளது. அதனால்தான், டாலருக்குப் பதில் 'தங்கமே கதி' எனச் சீனா மாறி வருகிறது.
சாமானியர்களுக்கு என்ன பாதிப்பு?
சீனாவின் இந்தத் தொடர் அதிரடி நடவடிக்கையால், சர்வதேச சந்தையில் தங்கம் மற்றும் வெள்ளியின் விலை ராக்கெட் வேகத்தில் உயர்ந்து வருகிறது.
தங்கம் இதுவரை இல்லாத புதிய உச்சத்தைத் தொட்டுள்ளது.
வெள்ளியும் புதிய சாதனைகளைப் படைத்து வருகிறது.
இதன் நேரடித் தாக்கம் இந்தியச் சந்தையிலும் எதிரொலிக்கிறது. நடுத்தர வர்க்கத்து மக்கள் தங்கம் வாங்குவது என்பது எட்டாக்கனியாக மாறிக் கொண்டிருக்கிறது. சர்வதேச அரசியலில் சீனா நடத்தும் இந்த 'பொருளாதாரச் சதுரங்க ஆட்டம்' சாமானியர்களின் வீட்டுப் பட்ஜெட்டைப் பதம் பார்த்துக்கொண்டிருக்கிறது என்பதே கசப்பான உண்மை!
Click it and Unblock the Notifications
Sign in with Google