Chennai Crow Death: சென்னையில் காகங்கள் கொத்துக் கொத்தாக இறந்தது ஏன்? டாக்டர் விளக்கம்

சென்னை: சென்னையில் காகங்கள் கொத்துக் கொத்தாக இறந்து விழுந்தது எதனால்? பறவைகளுக்கு உள்ள H5N1 என்ற வைரஸ் தொற்று மனிதர்களுக்கு பரவுமா என்பது குறித்து சிவகங்கை அரசு மருத்துவமனை மருத்துவர் டாக்டர் பரூக் அப்துல்லா அறிவுறுத்தியுள்ளார்.

இதுகுறித்து டாக்டர் பரூக் அப்துல்லா கூறியிருப்பதாவது: அண்மையில் சென்னை மற்றும் சுற்றுப்புற பகுதிகளில் காகங்கள் இறந்து விழுந்த செய்தியை அனைவரும் அறிவீர்கள்.

இது எதனால் நடந்தது என பார்த்த போது H5N1 வைரஸ் தொற்றினால் அது இறந்தது தெரியவந்தது. H5N1 என்றால் என்ன? எப்படி மனிதர்களிடையே பருவகாலங்களில் ஆண்டுதோறும் காய்ச்சல் வருகிறதோ அது போல்தான் பறவைகளுக்கும் கால்நடைகளுக்கும் தொற்றை ஏற்படுத்தும் வைரஸ்தான் எச்5என்1.

இந்த வைரஸால் மனிதர்களுக்கு பிரச்சனையா என கேட்டால் இப்போதைக்கு பெரிய பிரச்சனை இல்லை. மனிதரிடம் இருந்து இந்த வைரஸ் இன்னொரு மனிதருக்கு பரவவில்லை. எனவே இந்த வைரஸ் குறித்து யாரும் பீதியடைய வேண்டாம்.

இது பறவைகளிடையே மிகவும் வேகமாக பரவக் கூடிய வைரஸாக இருந்து வருகிறது. இதனால் நாம் எச்சரிக்கையாக இருக்க வேண்டும். பறவைகள் எங்காவது கொத்து கொத்தாக இறப்பதை பார்த்தால் உடனே கால்நடைத் துறையிடம் சொல்ல வேண்டும்.

இறந்த பறவையை கிளவுஸ் இல்லாமல் தொடக் கூடாது. இறக்க போகும் பறவைகளுக்கு எந்த பாதுகாப்பு அம்சங்களும் இல்லாமல் முதலுதவி சிகிச்சை அளிக்கக் கூடாது. இப்படி செய்தால் அந்த தொற்று நமக்கும் பரவ வாய்ப்பிருக்கிறது.

முட்டை, கோழி இறைச்சிகளில் இருந்து இந்த வைரஸ் நமக்கு பரவாது. ஆனாலும் முட்டை, மாமிசத்தை நன்றாக வேக வைத்து சாப்பிட வேண்டும். பச்சை முட்டையை குடிப்பது, முட்டையை அரைக்குறையாக சமைத்து சாப்பிடுவதை தவிர்த்துக் கொள்ள வேண்டும்.

யாருக்காவது இந்த தொற்றுடைய பறவைகளை தொட்ட பிறகு காய்ச்சல், தொண்டை வலி, உடல் வலி, உடல் சோர்வு, மூச்சுத்திணறல் ஆகிய அறிகுறிகள் இருந்தால் உடனடியாக மருத்துவரிடம் போய் சிகிச்சை எடுக்க வேண்டும்.

இந்த எச்5என்1 வைரஸுக்கு மருந்துகள் இருக்கின்றன. இந்த மருந்துகள் அனைத்து அரசு மருத்துவமனைகள், மருத்துவக் கல்லூரிகளிலும் இருக்கின்றன. எனவே பறவைக் காய்ச்சலால் மனிதர்கள் பாதிக்கப்பட்டால் அதற்கு சிகிச்சை இல்லை என நினைத்து பயப்படாதீர்கள். எனவே விழிப்புணர்வுடன் இருத்தல் வேண்டும். இது குறித்து பீதியடைய வேண்டாம். இவ்வாறு டாக்டர் பரூக் அப்துல்லா தெரிவித்துள்ளார்.

English summary

Following reports of crows dying in large numbers across Chennai, Sivagangai Government Hospital doctor Dr. Farooq Abdullah has explained the possible causes behind the incident. He also addressed public concerns about the H5N1 virus affecting birds and clarified whether the infection can spread to humans, offering important health guidance and precautionary advice.