இளைஞர்களே "தலகாணியை" வைத்துக் கொள்ளாதீர்கள்.. உயிர் போய்விடும்.. டாக்டர் அட்வைஸ்!

சென்னை: பான் மசாலா, குட்கா போன்ற போதை பொருட்களில் இருந்து இளைஞர்கள் விலகியே இருக்க வேண்டும் என மருத்துவர் பரூக் அப்துல்லா அறிவுறுத்தியுள்ளார்.

இதுகுறித்து டாக்டர் பரூக் அப்துல்லா தனது பேஸ்புக் பக்கத்தில் கூறியிருப்பதாவது: பான் மசாலா, குட்கா போன்றவை புகையிலை கொண்டு தயாரிக்கப்படுபவை.
நிகோடின் மூலம் போதைத் தன்மையை உருவாக்குபவை. இத்தகைய மெல்லும் வகையில் அல்லது வாய்க்குள் ஒதுக்கி வைத்துக் கொள்ளும் பான் மசாலா வகைகள் பற்களின் ஈறுகளில் புண்ணைத் தூண்டி எதிர்காலத்தில் புற்று நோயை உருவாக்கவல்லவை.

மேலும் தலகாணி / பில்லோ என்று இளைஞர்களால் செல்லமாக அழைக்கப்படும் வடிகட்டப்பட்ட புகையிலை ப்ராண்ட்டை வாய்க்குள் ஒதுக்கி வைத்துக் கொண்டு அதற்கு அடிமையாகிக் கொண்டிருப்பதையும் அறிய முடிகிறது. பள்ளி செல்லும் சிறார் முதல் கல்லூரி செல்லும் இளங்காளையர் வரை நடுத்தர வயதினர் முதல் முதியோர் வரை இத்தகைய பான் மசாலா, குட்கா , பில்லோ போன்றவற்றை பயன்படுத்தி வருவதை அறிய முடிகிறது.

இந்தப் போக்கு ஆபத்தானது. போதையின் பக்கம் இழுத்து கல்வியின் மீதும் செய்யும் தொழில் மீதும் நாட்டமற்றவர்களாய் மாற்றி கொள்கையோ எதிர்காலமோ அற்றவர்களாக மாற்றும் தன்மை கொண்டது. நிகோடின் என்பது இதய மற்றும் மூளை ரத்த நாளங்களில் சுருக்கத்தை ஏற்படுத்தி அடைப்பை உண்டாக்கி மரணத்தை விளைவிக்கலாம். பான் மசாலா/ குட்கா / பில்லோ போன்றவற்றால் வாய் மற்றும் தொண்டைப் பகுதி புற்று நோய் ஏற்படும் வாய்ப்பு அதிகம்.

தற்போதைய ஐபிஎல் போட்டிகளில் பான் மசாலா விளம்பரங்களில் கிரிக்கெட் ஜாம்பவான்கள் கபில் தேவ் , கவாஸ்கர், சேவக், க்ரிஸ் கெய்ல் போன்றோர் இடம்பெறுவது உள்ளபடி ஏமாற்றத்தையும் சலிப்பையும் கவலையையும் ஏற்படுத்துகிறது. இத்தகைய விளம்பரங்களை நாடு முழுவதும் உள்ள பள்ளி செல்லும் சிறார், சிறுமியர் இளையோர் பார்ப்பார்கள் என்ற பொறுப்பு அவர்களிடம் இல்லை என்பது உள்ளபடி வருத்தமளிக்கிறது.

இது போன்ற விளம்பரங்களுக்கு சுகாதாரத் துறை தடைவிதித்தாலும் நன்றே.
எனினும் இது குறித்து விழிப்புணர்வு ஏற்படுத்தி ஆபத்தை எடுத்துரைக்கும் பொறுப்பு நமக்கு இருக்கிறது. பான்மசாலா , குட்கா , பில்லோ , புகையிலை , சிகரெட், பீடி, சுருட்டு என அனைத்திலிருந்தும் விலகி இருப்பதே ஆரோக்கியம். இவ்வாறு டாக்டர் பரூக் அப்துல்லா தெரிவித்துள்ளார்.

English summary

Sivagangai Government hospital Dr Farook Abdulla says that youths should not be addicted to pan masala, ghutkha, pillow like drugs. It will spoil their education and future.