விஜய்காந்துக்கு அன்புமணி எச்சரிக்கை

திண்டிவனம்:

எங்களிடம் மோதினால் விடமாட்டோம் என்று நடிகர் விஜயகாந்துக்கு மத்திய அமைச்சர் அன்புமணி எச்சிரிக்கை விடுத்துள்ளார்.

பாமகவின் மாநில செயற்குழு கூட்டத்தில் கலந்து கொண்டு அவர் பேசியதாவது:

நமது நிறுவனர் ராமதாஸைப் பற்றியும், கட்சியைப் பற்றியும் தேவையில்லாமல் ஒரு நடிகர் வம்பு பேசிக் கொண்டிருக்கிறார். சினிமா விநியோகஸ்தர்கள் நமக்கு ஒரு வேண்டுகோள் விடுத்துள்ளனர். அவர்களுக்கு நமது கோரிக்கை என்னவென்றால் நீங்கள் அந்த நடிகரின் வாயை மூடிக் கொள்ளச் சொல்லுங்கள். எங்களிடம் மோதினால் நாங்கள் விடமாட்டோம் என்றார்.

பாமக தலைவர் ஜி.கே.மணி பேசுகையில், ஒரு நடிகர் தேர்தல் நேரத்தில் நம்மிடம் மோதினார். அது எடுபடாமல் போனது. இப்போது வேறொரு நடிகர் வம்புக்கு இழுக்கிறார். அவரின் படம் எங்கு ஓடினாலும் அதை தடுத்து நிறுத்த வேண்டும்.

திருவண்ணாமலையில் அந்த நடிகர் கூட்டம் நடத்தப் போவதாக தெரிவித்து இருக்கிறார்கள். அந்தக் கூட்டத்தை நடத்த விடக்கூடாது. என்ன வந்தாலும் பார்த்துக் கொள்வோம் என்றார்.

இக் கூட்டத்தில் மத்திய அமைச்சர் வேலு, மக்களவை உறுப்பினர்கள் ஏ.கே.மூர்த்தி, பொன்னுச்சாமி, தன்ராஜ், ராமதாஸ் ஆகியோரும் கலந்து கொண்டனர்.