தரமற்ற ஆசிரியர்கள்: தமிழகத்தில் 4,071 பி.இ. சீட்கள் குறைப்பு

சென்னை:

தமிழகத்தில் உள்ள 57 பொறியியல் கல்லூரிகளில் 4,071 கம்யூட்டர் கல்வி இடங்களைக் குறைக்க மத்திய தொழில்நுட்பக் கல்விக் கவுன்சில் உத்தரவிட்டுள்ளது. அதேபோல எம்.பி.ஏ. படிப்பிற்கான இடங்களைக் குறைக்கவும் உத்தரவிடப்பட்டுள்ளது.

குறைந்த சம்பளத்தில் தரமற்ற ஆசிரியர்களை வைத்து பாடம் நடத்துவது, தகுதியற்ற முதல்வர்கள் பதவியில் இருப்பது, அதிக கட்டணம், போதிய ஆய்வக, நூலக,கழிப்பறை வசதி இல்லாமை ஆகியவற்றைக் கருத்தில் கொண்டு இந்த இடங்கள் குறைக்கப்பட்டுள்ளன.

நாடு முழுவதும் ஐ.டி. (தகவல் தொழில் நுட்பம்), எலெக்ட்ரானிக்ஸ் அண்ட் கம்யூனிகேஷன் மற்றும் கம்ப்யூட்டர் சயின்ஸ் ஆகிய பாடப் பிரிவுகளில் மாணவர்சேர்க்கைக்கான இடங்களில் 38,000 இடங்கள் குறைக்கப்பட்டுள்ளன. இதில் தமிழகத்தில் மட்டும் 4,071 இடங்கள் குறைக்கப்பட்டுள்ளன.

அதே போல நாடு முழுவதும் எம்பிஏ சீட்களின் எண்ணிக்கையில் 3,016யைக் குறைக்கவும் உத்தரவிடப்பட்டுள்ளது. பார்மசி சீட்களின் எண்ணிக்கையும்குறைக்கப்படுகிறது.

மேலும் நாடு முழுவதும் உள்ள 98 கல்லூரிகள் தரத்தை உயர்த்தாவிட்டால் மாணவர் சேர்க்கைகான அனுமதி ரத்தாகும் என்றும் எச்சரிக்கப்பட்டுள்ளது.