பாஜகவின் விஷ நாடகம்: கருணாநிதி கடும் தாக்கு

சென்னை:

ஜின்னாவை மையமாக வைத்து, அத்வானியை கதாநாயகனாகக் கொண்டு பாஜகவினர் நடத்தியுள்ள நாடகம், வன்முறை விஷம்தோய்ந்தது என்று திமுக தலைவர் கருணாநிதி கூறியுள்ளார்.

இதுதொடர்பாக அவர் விடுத்துள்ள அறிக்கையில், இஸ்லாமியர்களின் போற்றுதலுக்குரிய ஜின்னாவை பாகிஸ்தானில் அத்வானிபுகழ்ந்து கூறி விட்டு டெல்லி திரும்பியதும், பாஜக ஆட்சி மன்றக் குழுக் கூட்டத்தில் ஜின்னாவை வசை மாரிப் பொழிந்துதீர்மானம் நிறைவேற்றியிருப்பது இஸ்லாமியர்கள் மனதில் பெரும் அதிருப்தியை விளைவித்துள்ளது.

அத்வானியை வைத்து ஜின்னா மீது சேற்றை வாரித் தூற்றியிருக்கிறது பாஜகவும் சங் பரிவாரும். இதன் மூலம் மதவாதநெருப்பில் குளிர்காயலாம் என்று பாஜக நினைத்தால் அக்கட்சிக்கு பெரும் ஏமாற்றமே விளையும்.

அத்வானியை கதாநாயகனாகக் கொண்டு பாஜக நடத்தியுள்ள இந்த நாடகம், வன்முறை விஷம் தோய்ந்தது. இதைக் கண்டுமக்கள் ஏமாறாமல், மத வாதத்திற்கு துளியும் இடம் கொடுக்காமல், வன்முறைக்கு பலியாகி விடாமல் இருந்து, மதச்சார்பற்றதன்மைக்கு உறுதுணையாக இருக்க வேண்டும் என்று கூறியுள்ளார் கருணாநிதி.