போலி வாக்காளர்கள்: அதிமுக மீது ஸ்டாலின் பாய்ச்சல்

சேலம்:

போலி வாக்காளர்கள் பிரச்சினைக்கு அதிமுகவே காரணம் என்று திமுக துணைப் பொதுச் செயலாளர் மு.க.ஸ்டாலின் குற்றம் சாட்டியுள்ளார்.

சேலத்தில் செய்தியாளர்களிடம் அவர் பேசுகையில், போலி வாக்காளர்களை ஏராளமான அளவில் சேர்த்தவர்கள் மீது தேர்தல் ஆணையம் கடும் நடவடிக்கை எடுக்கவேண்டும்.

போலி வாக்காளர்களை வாக்காளர் பட்டியலில் சேர்த்த அதிமுக மாவட்ட செயலாளர்கள், அமைச்சர்கள் ஆகியோரின் முகமூடி வெளியே தெரிந்து விடும் என்பதால்தான் தேர்தல் ஆணையத்தின் நடவடிக்கையை எதிர்த்து அதிமுக உயர்நீதிமன்றத்தில் வழக்கு தொடர்ந்துள்ளது.

வாக்காளர் பட்டியலில் ஏராளமான அளவுக்கு முறைகேடு நடந்ததற்கு அதிமுகவே காரணம்.

ராணி மேரி கல்லூரி விவகாரத்தில் என் மீது ஏற்கனவே வழக்கு பதிவு செய்யப்பட்டுள்ளது. தற்போது அதை திருத்தம் செய்து செஷன்ஸ் நீதிமன்றத்தில் தாக்கல்செய்துள்ளனர். இதை சட்ட ரீதியாக சந்திப்போம் என்று கூறினார் ஸ்டாலின்.