மதுரை விமான நிலைய விரிவாக்க பணி தீவிரம்: விரைவில் மலேசியாவுக்கு நேரடி விமானம்

சென்னை:

மதுரை விமான நிலையத்தில் 4 ஏர் பஸ் விமானங்கள் நிற்பதற்கு வசதியாக விரிவாக்கப் பணிகள் நடைபெற்று வருகிறது என்று இந்திய விமான நிலையங்களின்ஆணைய தென்மண்டல நிர்வாக இயக்குனர் ராமலிங்கம் கூறியுள்ளார்.

இந்திய விமான நிலைய ஆணையத்தின் தமிழ்நாடு, பாண்டிச்சேரி, கர்நாடகா, கேரளா மற்றும் ஆந்திரப் பிரதேச மாநிலங்கள் அடங்கிய தென் மண்டலத்தின்இயக்குனராக டாக்டர் கே.ராமலிங்கம் பொறுப்பேற்றுள்ளார்.

சென்னையில் அவர் நிருபர்களிடம் கூறுகையில், தென் மண்டலத்தில் உள்ள பல்வேறு விமான நிலையங்களில் ரூ.300 கோடி மதிப்பில் விரிவாக்கப் பணிகள்நடைபெற்று வருகின்றன. பெங்களூர் விமான நிலையத்தில் பெருகி வரும் பயணிகள் போக்குவரத்தை கருத்தில் கொண்டு கூடுதல் கவுண்டர்கள் அமைக்க முடிவுசெய்யப்பட்டுள்ளது.

மதுரை விமான நிலையத்தில் ஓடுபாதை விரிவாக்கப் பணிகள் நடைபெற்று வருகின்றன. அடுத்த ஆண்டு ஜூலை மாதத்திற்குள் இப்பணிகள் முடிவடையும். ஒரேநேரத்தில் நான்கு ஏர் பஸ்கள் நிறுத்தும் அளவிற்கு விமான நிலையத்தில் இடவசதி செய்து தரும் பணிகளும் இங்கு நடைபெற்று வருகின்றன.

அவசர கால பயன்பாட்டிற்காக தீ அணைப்பு நிலையமும், வெடிகுண்டு தடுப்பு நடவடிக்கைக்கான அமைப்பும் இங்கு அமைக்கப்படுகிறது. மேலும் மதுரை விமானநிலையத்தில் விமானங்கள் பாதுகாப்பாக தரையிறங்குவதற்காக நவீன முறையும் அறிமுகப்படுத்தப்பட உள்ளது.

இங்கு புதிய டெர்மினல்கள் அமைப்பதற்கான கட்டுமானப் பணிகளும் துவக்கப்பட்டு நடந்து வருகின்றன.

திருச்சி விமான நிலையத்திலும் ஓடுபாதை நீளம் அதிகரிப்பு, "ஏப்ரான் விரிவாக்கம், புதிய டெர்மினல்கள், கார்கோ வசதி உள்ளிட்ட பல மேம்பாட்டு பணிகள்நடைபெற்று வருகின்றன. இந்த பணிகளில் சில இந்த ஆண்டு இறுதிக்குள் முடிவடையும் என எதிர்பார்க்கப்படுகிறது என்றார் ராமலிங்கம்.

மலேசியாவிற்கு நேரடி சர்வீஸ்:

தற்போது சென்னையை தவிர தமிழகத்தில் உள்ள மற்ற விமான நிலையங்கள் சர்வதேச விமானங்கள் வந்து போக வசதியற்றவைகளாக இருப்பதால் மலேசியாஉள்ளிட்ட பல தெற்காசிய நாடுகளுக்கு செல்ல விரும்பும் பயணிகள் சென்னைக்கு வர வேண்டியுள்ளது.

இந் நிலையில் இந்தியன் ஏர்லைன்ஸ் மற்றும் ஜெட் ஆகிய விமான நிறுவனங்கள் மதுரை மற்றும் திருச்சியில் இருந்து கோலாலம்பூருக்கு நேரடி விமான சர்வீஸ்களைஇயக்க அனுமதி கோரியுள்ளன. மதுரை மற்றும் திருச்சி விமான நிலையங்களில் நடந்து வரும் விரிவாக்கப் பணிகள் நிறைவடையும் போது இந்த திட்டம் சாத்தியமாகும்என்று கூறப்படுகிறது.

நேரம் மாற்றம்:

மதுரை, திருச்சி விமான நிலையங்களில் விரிவாக்கப் பணிகள் நடைபெற்று வருவதால் இந்த விமான நிலையங்களுக்கு வந்து செல்லும் விமானங்களின் நேரம்மாற்றப்பட்டுள்ளது. சில விமானங்கள் ரத்து செய்யப்பட்டுள்ளன.