சிபிஎஸ்இ: 6ம் வகுப்பு முதல் செக்ஸ் கல்வி!

சென்னை:

மத்திய அரசின் சிபிஎஸ்இ பாடத்திட்டத்தின் கீழ் பயிலும் மாணவ, மாணவியருக்கு 6ம் வகுப்பு முதல் செக்ஸ்கல்வி அறிமுகப்படுத்தப்படவுள்ளது.

இளம் வயதினருக்கு பாலியல் தொடர்பான அடிப்படை அறிவை கற்பிக்கும் வகையில், கல்வித் திட்டத்தில் செக்ஸ்கல்வியை அறிமுகப்படுத்த மத்திய பள்ளிக் கல்வி வாரியம் (CBSE) முடிவு செய்துள்ளது.

இதன்படி 6ம் வகுப்பு முதல் இந்த செக்ஸ் கல்வி அறிமுகப்படுத்தப்படும். வாலிப வயதில் ஆண், பெண் உடலில்ஏற்படும் மாற்றங்கள், செக்ஸ் குறித்த அடிப்படை விஷயங்கள் மாணவ, மாணவியருக்கு போதிக்கப்படும்.

உடல் ரீதியான மாற்றங்கள், ஈர்ப்புகள், பால்வினை நோய்கள், உடல் உறுப்புகள் குறித்த அடிப்படை விஷயங்கள்,எய்ட்ஸ் விழிப்புணர்வு உள்ளிட்டவை இந்த பாடத் திட்டத்தில் இடம் பெறும்.

டீன் ஏஜ் எனப்படும் 13 வயது முதல் 19 வயது வரையிலான கால கட்டத்தில் மன ரீதியாக, உடல் ரீதியாகஏற்படும் மாற்றங்கள், உளவியல் பிரச்சினைகள், அவற்றை எப்படி சமாளிப்பது, சந்திப்பது என்பது குறித்தும்கற்றுத் தரப்படும்.

இதற்கென தனியாக புத்தகம் எதுவும் வெளியிடப்பட மாட்டாது. விநாடி வினா, விவாதங்கள், நாடகம் உள்ளிட்டஊடகங்கள் வாயிலாக இவை போதிக்கப்படும். இதற்கென தனியாக தேர்வும் இருக்காது.

செக்ஸ் குறித்த அடிப்படை அறிவு மாணவ, மாணவியருக்கு இருக்க வேண்டும், அதன் மூலம் வாலிப வயதில்ஏற்படும் சவால்களை எளிதில் அவர்கள் சந்திக்க வேண்டும் என்பதுதான் இந்தத் திட்டத்தின் முக்கிய நோக்கம்.

வருகிற கல்வியாண்டு முதல் இந்த செக்ஸ் கல்வி அறிமுகமாகும் எனத் தெரிகிறது. இருப்பினும் அதற்கு முன்புபெற்றோர்கள், ஆசிரியர்களுடன் ஆலோசனை மேற்கொள்ளவும் சிபிஎஸ்இ திட்டமிட்டுள்ளது.