பாலாறு: மின்சாரத்தை துண்டித்து தமிழக எல்லை கிராமங்களுக்கு ஆந்திரம் டார்ச்சர்

வாணியம்பாடி:பாலாறு குறுக்கே அணை கட்டுவதற்கு தமிழக அரசு எதிர்ப்பு தெரிவித்து வரும் நிலையில் , தமிழக எல்லை பகுதியில் மின்சாரம் துண்டித்துள்ளது ஆந்திர அரசு. இதன் மூலம் அப் பகுதியில் வசிக்கும் தமிழக மக்களுக்கு இடையூறுகளை ஏற்படுத்தி வருகிறது.

பாலாற்றின் குறுக்கே ஆந்திர அரசு அணை கட்ட முயற்சி மேற்கொண்டு வருகிறது. இதற்கு தமிழகத்தில் பாமக உள்ளபட அனைத்து அரசியில் கட்சிகளும் எதிர்ப்பு தெரிவித்து போராட்டங்கள் நடத்தி வருகின்றன. தமிழக அரசும் ஆந்திர அரசின் செயலுக்கு எதிர்ப்பு தெரிவித்துள்ளது.

இந் நிலையில் எல்லையில் வசிக்கும் தமிழக மக்களுக்கு மின்சாரத்தை துண்டித்து பல்வேறு இடையூறுகளை செய்து வருகிறது ஆந்திரம்.

வேலூர் மாவட்டம் ஆந்திர-தமிழக எல்லையில் தகரங்குப்பம் கிராமம் உள்ளது. இங்குள்ள 93 வீடுகளுக்கும், 83 பம்ப்செட்டுகளுக்கும் ஆந்திர அரசு மின் இணைப்பு கொடுத்துள்ளது.

பாலாறு அணைக்கு தமிழக அரசு எதிர்ப்பு தெரிவித்து வருவதால் தமிழக பகுதியில் உள்ள கிராமங்களுக்கு மின்சாரம் வழங்குவதை நிறுத்தியுள்ளது ஆந்திரம்.

முதல் காட்டமாக தகரங்குப்பத்தில் விவசாய பம்ப் செட்டுகளுக்கு கொடுக்கப்பட்ட மின் இணைப்புகளை ஆந்திர ஆதிகாரிகள் துண்டித்துள்ளனர்.

மேலும் வீடுகளுக்கு வழங்கப்பட்ட மின்சாரத்தையும் ஆந்திர அரசு துண்டித்து விட்டனர்.

இதனால் கடந்த 2 மாதங்களாக தகரங்குப்பம் கிராமத்தினர் இருளில் மூழ்கியுள்ளனர். இதை எதிர்த்து இக்கிராமத்தினர் போராட்டங்கள் நடத்தி வருகின்றனர்.

இந் நிலையில் நேற்று மாலை ஆந்திர மாநில மின்சாரத்துறை அதிகாரிகள் 10 பேர் தகரங்குப்பம் கிராமத்துக்கு வந்து அங்கு நிறுவப்பட்டுள்ள 3 மின்சார டிரான்ஸ்பார்மர்களை அகற்றி எடுத்துச் செல்ல முயன்றனர்.

இதை அறிந்த கிராமத்தினர் அதிகாரிகளை முற்றுகையிட்டு கோஷமிட்டனர்.

மேலும் டிரான்ஸ்பார்மர்களை அகற்ற விடமாலும், அதிகாரிகளை அங்கிருந்து போக விடாமலும் சிறை பிடித்தனர். இதுகுறித்து தகவல் அறிந்த தமிழக பகுதியில் இருந்து போலீஸார், தாசில்தார் ஆகியோர் அங்கு விரைந்து சென்று கிராமத்தினருடன் பேச்சு வார்த்தை நடத்தி ஆந்திர அதிகாரிகளை மீட்டு பத்திரமாக அனுப்பி வைத்தனர்.

இன்று ஆந்திர அதிகாரிகள் மீண்டும் ஆந்திர போலீஸ் பாதுகாப்புடன் வந்து டிரான்ஸ்பார்மர்களை எடுத்த செல்ல திட்டமிட்டு இருப்பதாக கூறப்படுகிறது.

இதனால் தகரங்குப்பத்தில் பெரும் பதற்றம் நிலவுகிறறு.