அல்உம்மா கைதிக்கு செல்போன்- 2 பேர் கைது

திருநெல்வேலி:பாளையங்கோட்டை மத்திய சிறைச்சாலையில் அடைக்கப்பட்டுள்ள அல் உம்மா கைதி, பேசுவற்காக நீதிமன்றக் கழிவறையில் செல்போன் வைத்த 2 பேரை போலீஸார் கைது செய்துள்ளனர்.

பாளையங்கோட்டை சிறைச்சாலையில் கைதிகளுக்கு கஞ்சா, செல்போன் உள்ளிட்டவை சப்ளை செய்யப்படுவதாக வந்த புகாரைத் தொடர்ந்து சிறைத்துறை அதிகாரிகள் அடிக்கடி சோதனை நடத்தி செல்போன்கள், கஞ்சா உள்ளிட்டவைகளை கைப்பற்றி வருகின்றனர்.

மேலும் அங்கு அடைக்கப்பட்டிருக்கும் அல் உம்மா கைதிகளுக்கு செல்போன் வழங்கப்பட்டதும் கண்டுபிடிக்கப்பட்டது. இதுவரை மொத்தம் 20 செல்போன்கள் பறிமுதல் செய்யப்பட்டுள்ளன.

இந் நிலையில் மேலப்பாளையத்தில் 3 பேரை படுகொலை செய்த வழக்கில் கைதான அல் உம்மா அமைப்பைச் சேர்ந்த ரசூல் மைதீன் என்பவரை, வேறு ஒரு வழக்கில் நெல்லை மாவட்ட முதலாவது விரைவு நீதிமன்றத்தில் ஆஜர்படுத்த போலீஸார் அழைத்து வந்தனர்.

அப்போது சிறுநீர் வருவதாக மைதீன் கூறியுள்ளார். இதையடுத்து நீதிமன்ற வளாகத்தில் உள்ள கழிப்பறைக்கு போலீஸார் அழைத்துச் ெசன்றனர்.

முன்னெச்சரிக்கையாக போலீசார் கழிப்பறைக்குள் சென்று பார்த்த போது அங்கு ஒரு செல்போன் வைக்கப்பட்டிருந்தது கண்டுபிடிக்கப்பட்டது. இதையடுத்து உயர் அதிகாரிகளுக்கு போலீஸார் தகவல் கொடுத்தனர்.

அதிகாரிகள் விரைந்து வந்து விசாரணை நடத்தியதில் சிறைச்சாலையில் செல்போன் கெடுபிடி அதிகரித்துள்ளதால் கழிவறையில் வைத்து பேசுவதற்கு ஏற்பாடு செய்தது தெரிய வந்தது.

இந்த கழிவறை செல்போன் வசதியை ஏற்படுத்தியது மேலப்பாளையம் பகுதியைச் சேர்ந்த ஷாலின், முகமது இஸ்மாயில் ஆகியோர்தான் என்பதும் தெரிய வந்தது. இதையடுத்து இருவரையும் போலீஸார் கைது செய்தனர்.

கோவை குண்டு வெடிப்பில் இன்று தீர்ப்பு வெளியாக உள்ள நிலையில் அல் உம்மா கைதி பேசுவதற்கு கழிவறையில் செல்போன் வைத்த சம்பவம் நெல்லையில் பரபரப்பை ஏற்படுத்தியுள்ளது.

கோவை குண்டு வெடிப்பில் இன்று தீர்ப்பு வெளியான நிலையில் அல் உம்மா கைதி பேசுவதற்கு கழிவறையில் செல்போன் வைத்த சம்பவம் நெல்லையில் பரபரப்பை ஏற்படுத்தியுள்ளது.