தடைகளைத் தாண்டி மக்கள் ஆதரவுடன்வெற்றி பெறுவோம்: கருணாநிதி

சென்னை:மக்களுக்கு நலன் பயக்கும் திட்டங்களுக்கு சிலர் தெரிவித்து வரும் எதிர்ப்புகள், இடையூறுகளுக்கு நானோ எனது அரசோ பயப்பட மாட்டோம். மாறாக, அவற்றை மக்கள் ஆதரவுடன் தகர்த்து வெற்றிகரமாக திட்டங்களை நிறைவேற்றுவோம் என்று முதல்வர் கருணாநிதி கூறியுள்ளார்.

சென்னை அடையாறு முகத்துவாரப் பகுதியில் ரூ. 100 கோடியில் சுற்றுச்சூழல் பூங்கா அமைக்கப்படவுள்ளது. இதற்கான அடிக்கல் நாட்டு விழா நேற்று நடந்தது. இதில் முதல்வர் கருணாநிதி கலந்து கொண்டு அடிக்கல் நாட்டி வைத்தார்.

நிகழ்ச்சியில், கருணாநிதி பேசுகையில், மக்களுக்கு நன்மை பயக்கும் திட்டங்களை சிலர் வேண்டுமென்றே திட்டமிட்டு எதிர்க்கிறார்கள். ஆனால் நானோ எனது அரசோ, திமுகவோ இதைக் கண்டு அஞ்ச மாட்டோம். இந்த இடையூறுகளைத் தாண்டி மக்கள் ஆதரவுடன் அந்தத் திட்டங்களை நிறைவேற்றுவோம்.

பிற மாநிலங்களை விட தமிழகம் தொழில்துறையில் வேகமாக முன்னேறி வருகிறது. ஆனால் இதை விரும்பாத சிலர் அரசின் நலத் திட்டங்களுக்கு, மக்கள் நலத் திட்டங்களுக்கு இடையூறு செய்தவண்ணம் உள்ளனர். அரசு மீது எதற்கெடுத்தாலும் குற்றம் கண்டுபிடிக்கிறார்கள்.

இத்தகைய திட்டங்களை நிறுத்தக் கோரி நீதிமன்றங்களையும் நாடுகிறார்கள். இந்த அடையாறு பூங்கா திட்டத்தையும் கூட சிலர் எதிர்க்கிறார்கள். நீதிமன்றத்தையும் அணுகினர்.

அரசு கொண்டு வரும் நலத் திட்டங்கள் எனக்கோ அல்லது எனது குடும்பத்துக்கோ அல்லது திமுகவுக்காக கொண்டு வரப்படுபவை அல்ல. தொலைதூரத்தில் வாழ்ந்து கொண்டிருக்கும் கருப்பன், முத்து, கந்தன், கடம்பன் போன்ற சாமானியர்களுக்கான திட்டங்கள் அவை.

மக்கள் நலத் திட்டங்களை நிறைவேற்றுவதற்காக எனது வாழ்க்கையை கூட அர்ப்பணிக்கத் தயாராக இருக்கிறேன். இது போன்ற எதிர்ப்புகளை சமாளித்து, எப்படி வெற்றி காண்பது என்பது குறித்த பாடங்களையும், உத்திகளையும் எனது அரசியல் ஆசான்களிடமிருந்து நிறையவே கற்றுள்ளேன்.

எனது வேண்டுகோள் எல்லாம், மக்கள் இந்தத் திட்டங்களைப் புரிந்து கொண்டு, அரசின் நல்லெண்ணத்தை தெரிந்து கொண்டு அவற்றுக்கு முழு ஆதரவு தர வேண்டும் என்றார் கருணாநிதி.

350 ஏக்கரில் அமையவுள்ள அடையாறு பூங்கா, 2 ஆண்டுகளில் உருவாக்கப்படும் என நிகழ்ச்சியில் தெரிவிக்கப்பட்டது.

நிகழ்ச்சியில் அமைச்சர் மு.க.ஸ்டாலின், துரைமுருகன், சென்னை மேயர் மா.சுப்ரமணியம், கவிஞர் வைரமுத்து உள்ளிட்டோர் கலந்து கொண்டனர்.