அரபு நாடுகளில் இனி இந்தியப் பணிப்பெண்களுக்கு குறைந்தபட்ச சம்பளம் 400 டாலர்

துபாய்:ஐக்கிய அரபு எமிரேட்ஸில் பணியாற்றும் இந்தியப் பணிப் பெண்களுக்கு குறைந்தபட்சம் 400 டாலர் சம்பளம் நிர்ணயிக்கப்பட்டுள்ளது. விரைவில் இது அமலுக்கு வரவுள்ளது.

இதுகுறித்து துபாயில் உள்ள இந்திய தூதர் வேணு ராஜாமணி கூறுகையில், இதுகுறித்த முறையான அறிவிப்பு எதுவும் எங்களுக்கு இதுவரை வரவில்லை. ஆனால் இப்படி ஒரு திட்டம் நடைமுறைக்கு வரவுள்ளது என்பது மட்டும் தெரியும்.

இந்தியப் பணிப் பெண்களை அரபு நாடுகளில் வேலைக்கு எடுப்பதற்கான வழி முறைகளும் கூட வகுக்கப்பட்டுள்ளன. ஆனால் அவை இன்னும் சட்டப்பூர்வ வடிவம் பெறவில்லை. இருப்பினும் செப்டம்பர் 1ம் தேதி முதல் இவை அமலுக்கு வரக் கூடும் எனத் தெரிகிறது என்றார்.

மத்திய அரசு சமீபத்தில் இந்தியப் பணிப்பெண்கள் நலன் குறித்த சில முக்கிய முடிவுகளை எடுத்தது. அதன்படி, இந்தியாவிலிருந்து வீட்டு வேலைக்கு பெண்களை எடுப்போர் அவர்களுக்கு குறைந்தபட்ச ஊதியமாக மாதம் 400 டாலர் (அதாவது தோராயமாக 1468 தினார்) சம்பளாக தர வேண்டும்.

அவர்களுக்கு பிரீ பெய்டு மொபைல் இணைப்பும் இலவசமாக தரப்பட வேண்டும். இதன் மூலம் அந்தப் பணிப்பெண்களை இந்தியத் தூதரகம் தொடர்ந்து கண்காணித்து வர முடியும். அவர்களின் பிரச்சினைகளை உடனுக்குடன் அணுக முடியும். அவர்கள் மீதான குற்றங்களை தடுக்கவும் இது வழி செய்யும்.

அரபு நாடுளில் அதிகம் வேலை பார்ப்பவர்கள் இந்தியர்கள் மற்றும் பிலிப்பைஸன் நாட்டவர்கள்தான். பிலிப்பைன்ஸில் உள்ளதைப் போல இந்தியத் தொழிலாளர்களை நான்கு வகைகளாக அதாவது ஆயாக்கள் (பணிப்பெண்கள்), பட்லர்கள், சமையல்காரர்கள், டிரைவர்கள் என மத்திய அரசு நான்கு வகையாக பிரித்துள்ளது. பிலிப்பைன்ஸ் அரசுடன் கலந்து ஆலோசித்த பின்னர் இந்திய பணிப்பெண்கள் குறித்த பல முக்கிய முடிவுகளை மத்திய அரசு எடுத்துள்ளது.

இந்தியத் தொழிலாளர்களுக்கு குறைந்தபட்ச ஊதியம் நிர்ணயம் செய்வது தொடர்பாக சமீபத்தில் மத்திய வெளிநாடு வாழ் இந்தியர் விவகாரத் துறை அமைச்சர் வயலார் ரவி பிலிப்பைன்ஸ் சென்றிருந்தார்.

இந்த நடவடிக்கைகள் குறித்து ராஜாமணி கூறுகையில், இந்தியத் தொழிலாளர்கள் ஏமாற்றப்படுவதிலிருந்தும், துன்புறுத்தப் படுவதிலிருந்தும் தடுக்கும் முகமாகவே இந்த சீரமைப்பு நடவடிக்கைகள் எடுக்கப்பட்டுள்ள என்றார்.

மேலும் 30 வயதுக்குட்பட்ட இந்தியப் பெண்களை அரபு நாடுகளில் பணிப்பெண்களாக அமர்த்த வேண்டுமானால் இந்திய குடியேற்றத்துறையின் சான்றிதழ் பெற வேண்டும். மற்றவர்களுக்கு அது தேவையில்லை.