ராணுவ முகாம் அழிப்பு-கருணா குழுவினர் 4 பேர் பலி

மட்டக்களப்பு: மட்டக்களப்பு மாவட்டத்தில் உள்ள ராணுவ முகாமை சுற்றி வளைத்து தாக்கிய விடுதலைப் புலிகள் அந்த முகாமை அழித்தனர். இந்த மோதலில் அங்கிருந்த கருணா தலைமையிலான அமைப்பைச் சேர்ந்த வீரர்கள் உள்பட 4 பேர் கொல்லப்பட்டனர். 6 பேர் உயிருடன் சிறை பிடிக்கப்பட்டனர்.

மட்டக்களப்பு மாவட்டம் செங்கலடியில் இலங்கை ராணுவத்துடன் இணைந்து கருணா தலைமையிலான தமிழீழ மக்கள் விடுதலைப் புலிகள் குழுவினர் இயங்கி வருகின்றனர். இத்தகைய ராணுவ முகாம் மீது நேற்று அதிகாலை 12:15 மணியளவில் திடீர் தாக்குதலில் விடுதலைப் புலிகள் ஈடுபட்டனர்.

இத்தாக்குதலில் கருணா குழுவைச் சேர்ந்த நான்கு பேர் கொல்லப்பட்டுள்ளனர். ஆறு பேர் விடுதலைப் புலிகளால் சிறை பிடிக்கப்பட்டுள்ளனர்.

முகாம் முற்றிலும் அழிக்கப்பட்டது. அங்கிருந்த பெருமளவிலான ஆயுதங்களும் கைப்பற்றப்பட்டன.