தானேவில் ரயில் தடம் புரண்டது -சேவை பாதிப்பு

மும்பை: மும்பை அருகே உள்ள தானேவில் இன்று காலியாக சென்ற ரயில் தடம் புரண்டதில் 3 பெட்டிகள் தண்டவாளத்தை விட்டு இறங்கி விட்டன. இதனால் ரயில் சேவை பாதிக்கப்பட்டது.

இதுகுறித்து மத்திய ரயில்வே செய்தித் தொடர்பாளர் ஏ.கே.ஜெயின் கூறுகையில், காலியாக சென்ற அந்த ரயில் கர்ஜாத் நோக்கி போய்க் கொண்டிருந்தபோது தடம் புரண்டது. இதில் 3 பெட்டிகள் தண்டவாளத்தை விட்டு இறங்கி விட்டன.

இதில் யாருக்கும் காயம் ஏதும் ஏற்படவில்லை.

இதையடுத்து தானே - முலுந்த் இடையிலான ஸ்லோ லைனில் இயக்கப்பட்டு வந்த உள்ளூர் ரயில்கள் அதி வேக பாதையில் மாற்றி விடப்பட்டுள்ளன.

இந்த விபத்து காரணமாக அனைத்து ரயில்களும் அரை மணி நேரம் தாமதமாக ஓடுகின்றன. மீட்புப் பணிகள் முடுக்கி விடப்பட்டுள்ளதாக தெரிவித்தார்.