அதிகரிக்கும் 'இ குப்பை'-அப்துல் கலாம் கவலை

டெல்லி: நாட்டில் அதிகரித்து வரும் 'இ குப்பை'யால் சுற்றுச்சூழலுக்கும், சுகாதாரத்திற்கு பெரும் கேடு ஏற்படும் என முன்னாள் குடியரசுத் தலைவர் அப்துல் கலாம் கவலை தெரிவித்துள்ளார்.

பயன்படுத்தப்பட்டு தூக்கி எறியப்படும் கம்ப்யூட்டர்கள், மொபைல் போன்கள், ரெப்ரிஜிரேட்டர்கள் உள்ளிட்டவைதான் இ வேஸ்ட் என அழைக்கப்படுகின்றன. இதுதவிர பயன்படுத்தப்படாத வயர்கள், பேட்டரிகள், பிளக், ஸ்விட்ச்சுகள் உள்ளிட்ட எலக்ட்ரானிக், எலக்டிரிகல் பொருட்களும் இ குப்பைகள்தான்.

இதுபோன்ற இ குப்பைகளால் சுற்றுச்சூழலுக்கும், சுகாதாரத்திற்கும் பெரும் சீர்கேடுகள் ஏற்படுகின்றன. இதைத்தான் கலாம் தெரிவித்து கவலை வெளியிட்டுள்ளார்.

டெல்லியில் நடந்த இ குப்பை ரீசைக்ளிங் குறித்த கருத்தரங்கைத் தொடங்கி வைத்து அவர் பேசுகையில், அதிகரித்து வரும் இ குப்பையால் பல்வேறு சுகாதார சீர்கேடுகள் ஏற்படுகின்றன. இதைத் தடுக்க உரிய முறையில் அவற்றை ரீசைக்கிள் செய்வது அவசியமாகும்.

ஆண்டுதோறும் 10 சதவீத அளவுக்கு இ குப்பைகள் நமது நாட்டில் அதிகரித்து வருகின்றன. ஆனால் நகர்ப்புற இந்தியாவில் வெறும் ஐந்து சதவீத இ குப்பைகள்தான் ரீசைக்கிள் செய்யப்படுகின்றன.

இ குப்பைகளை உரிய முறையில் சேகரித்து அவற்றை ரீசைக்கிள் செய்ய உரிய முறைகளை நாம் கையாள வேண்டியது அவசியம், அவசரம்.

காரணம் அதில் உள்ள காரீயம், மெர்க்குரி உள்ளிட்ட வேதிப் பொருட்களால் பல்வேறு அபாயகரமான விளைவுகளை நாம் சந்திக்க நேரிடும் என்றார் கலாம்.