மலேசியாவில் தவித்த 18 தமிழர்கள் பத்திரமாக சென்னை திரும்பினர்!

சென்னை: மலேசியாவில் கார்பெட் தொழிற்சாலை மூடப்பட்டதால் வேலையின்றி தவித்த 18 வாலிபர்கள் சென்னை வந்து சேர்ந்தனர்.

மதுரை, ராமநாதபுரம், திருவாரூர், தஞ்சாவூர் மாவட்டங்களில் இருந்து 18 வாலிபர்கள், கார்பெட் தயாரிக்கும் தொழிற்சாலை ஒன்றில் வேலை பார்ப்பதற்காக கடந்த 2 ஆண்டுகளுக்கு முன் மலேசியா சென்றனர்.

மாதந்தோறும் ரூ.20 ஆயிரம் சம்பளம், தங்குமிடம், உணவு இலவசம் என கூறி இவர்கள் அழைத்து செல்லப்பட்டனர்.
அங்கு சென்றபின் முதல் 2 மாதம் சம்பளம் கிடைக்கவில்லை. அதன் பின்னர் மாத சம்பளம் ரூ.10 ஆயிரம் மட்டுமே வழங்கப்பட்டது.

கடந்த 6 மாதங்களுக்கு முன்பு தொழிற்சாலையும் மூடப்பட்டு விட்டது. இதனால் 18 பேரும் கையில் பணமின்றி மலேசியாவில் சுற்றித் திரிந்தனர்.

இந்நிலையில் 18 பேரும், தங்கள் உறவினர்களுக்கு கடிதம் எழுதி பணத்தை பெற்று மலேசியாவில் இருந்து விமானம் மூலம் சென்னை வந்து சேர்ந்தனர்.