இந்தியாவுடன் நாங்கள் நேரடியாக மோதவில்லை - நட்பாக இருக்க முடியும்: தலிபான்கள்

டெல்லி: இந்தியாவுடன் நாங்கள் நேரடி மோதலில் ஈடுபடவில்லை. இந்தியாவுக்கும், ஆப்கானிஸ்தானுக்கும் இடையே வரலாற்றுச் சிறப்பு வாய்ந்த உறவுகள், நெருக்கம் உள்ளது. எனவே இந்தியாவுடன் நாங்கள் நட்புடன் இருக்க முடியும், அந்த சூழலை ஏற்படுத்த முடியும் என்று தலிபான் அமைப்பு கூறியுள்ளது.

இதுகுறித்து தலிபான் செய்தித் தொடர்பாளர் சபியுல்லா முஜாஹித் அளித்துள்ள ஒரு பேட்டியில், ஆப்கானிஸ்தானை விட்டு இந்தியா வெளியேற வேண்டும் என்று நாங்கள் விரும்பவில்லை. அதேசமயம் காபூலில் நடந்த தாக்குதல்களை நாங்கள் தவறு என்றும் சொல்ல விரும்பவில்லை.

இந்தியாவுக்கும், தலிபான்களுக்கும் இடையே நட்பான சூழலை ஏற்படுத்த முடியும். நட்பாக இருக்க முடியும். இந்தியாவுடன் நாங்கள் நேரடியாக எந்த இடத்திலும் மோதியதில்லை.

அதேசமயம், ஹமீத் கர்சாயை இந்தியா ஆதரிப்பதை நாங்கள் வெறுக்கிறோம். மேற்கத்திய நாடுகளுக்கு ஆதரவாக இந்தியா செயல்படுவதை நாங்கள் எதிர்க்கிறோம்.

தலிபான்கள் ஆட்சியைப் பிடித்தால், இந்தியா உள்பட அனைத்து நாடுகளுடனும் நட்புறவை பேணுவோம். தலிபான்களும், இந்தியாவும் இணைந்து செயல்படுவது சாத்தியமானதே.

ஆப்கானிஸ்தானுக்கு மேற்கத்திய நாடுகள் படைகளை அனுப்பி எங்களைத் தாக்கி வருகின்றன. ஆனால் இந்தியா அப்படிச் செய்யவில்லை. ஆப்கானிஸ்தானை மறு சீரமைக்க மட்டுமே இந்தியா உதவி வருகிறது. எனவே இந்தியாவுக்கும், மேற்கத்திய நாடுகளுக்கும் வித்தியாசம் உள்ளது.

அதேசமயம், ஆப்கன் போரில் இந்தியா நடுநிலையுடன் இருக்கவில்லை. ராணுவ ரீதியாக இந்தியா ஆப்கானிஸ்தானில் செயல்படவில்லை என்றாலும் கூட ராணுவ பலத்தை வைத்து ஆப்கன் மக்களை ஒடுக்கி வரும் அமெரிக்கா தலைமையிலான படைக்கு ஆதரவாக உள்ளது. அவர்களின் ஆதரவை நாடி வரும் ஹமீத் கர்சாய் அரசை பலப்படுத்தி வருகிறது.

ஆக்கிரமிப்புப் படையினரால் அப்பாவிகள் பலர் கொல்லப்பட்டபோது அதை இந்தியா கண்டிக்கவில்லை.

பிப்ரவரி 26ம் தேதி காபூலில் நடந்த ஹோட்டல்கள் மீதான தாக்குதலுக்கு நாங்கள் தான் பொறுப்பு. தலிபான் வீரர்கள்தான் அதைச் செய்தனர். இந்திய உளவு அமைப்பான ராவின் ஏஜென்டுகள் அங்கு கூடியிருப்பதாக கிடைத்த தகவலின் பேரில்தான் அதைச் செய்தோம்.

இந்தியாவுக்கும், ஆப்கானிஸ்தானுக்கும் இடையிலான உறவு நீண்டு நெடியது. வரலாற்றுச் சிறப்பு வாய்ந்த உறவு. எனவே இந்தியாவுடன் நாங்கள் நேரடி மோதலில் ஈடுபடவில்லை. அதேசமயம், இந்தியாவின் நிலைப்பாடும் தவறானது என்பதைத் தெரிவித்துக் கொள்கிறோம் என்றார்ர சபியுல்லா.