லாவோஸுக்கு புறப்பட்டார் பிரதீபா பாட்டீல்: அங்கிருந்து கம்போடியா பயணம்

டெல்லி: குடியரசுத் தலைவர் பிரதீபா பாட்டீல் 10 நாள் சுற்றுப்பயணமாக லாவோஸ், கம்போடியா நாடுகளுக்குச் செல்கிறார். அதற்காக அவர் இன்று தலைநகர் டெல்லியில் இருந்து புறப்பட்டார். தன்னுடன் மத்திய அமைச்சர் காந்திலால் புரியா தலைமையிலான உயர் மட்டக் குழுவையும் அழைத்துச் சென்றுள்ளார்.

பிரதீபா முதலில் லாவோஸ் செல்கிறார். தனது சுற்றுப்பயணத்தின் முதல் 5 நாட்கள் அதாவது வரும் 13-ம் தேதி வரை அங்கு தங்குகிறார்.

13-ம் தேதி லாவோஸில் இருந்து புறப்படும் அவர் கம்போடியா செல்கிறார். அங்கு வரும் 18-ம் தேதி வரை சுற்றுப்பயணம் மேற்கொள்கிறார். இந்த இரு நாடுகளுக்கும், இந்தியாவிற்கும் இடையே கலாச்சாரம் சம்பந்தப்பட்ட ஒப்பந்தங்கள் கையெழுத்தாகவுள்ளது என்று தெரிகிறது.

இந்தியா ஐ.நா. பாதுகாப்பு சபையின் நிரந்தர உறுப்பினர் அந்தஸ்தைப் பெற பல்வேறு முயற்சிகள் மேற்கொண்டு வருகிறது. இந்தியாவின் இந்த முயற்சிக்கு லாவோஸ், கம்போடியா நாடுகள் ஆதரவளிப்பது குறிப்பிடத்தக்கது.

கம்போடியா நாட்டின் முக்கிய சுற்றுலாத்தளமும், உலகின் மிகப் பெரிய கோவிலுமான அங்கோர் வாட்டிற்கு பிரதீபா பாட்டீல் செல்கிறார்.