+2வில் மோசமான ரிசல்ட்: பள்ளிகளுக்கு நோட்டீஸ் அனுப்பும் கல்வித் துறை

பொள்ளாச்சி: பொள்ளாச்சி கல்வி மாவட்டத்தில், பிளஸ் 2 பொதுத்தேர்வில் 60 சதவீதத்திற்கும் குறைவான தேர்ச்சி பெற்ற பள்ளிகளுக்கு விளக்கம் கேட்டு நோட்டீஸ் அனுப்ப கல்வித் துறை திட்டமிடப்பட்டுள்ளது.

பொள்ளாச்சி கல்வி மாவட்டம்

பொள்ளாச்சி கல்வி மாவட்டத்தில் மொத்தம் 49 பள்ளிகள் உள்ளன. இதில் 16 அரசு பள்ளிகளும், ஒரு ஆதிதிராவிட நலப்பள்ளியும், 6 அரசு உதவிபெறும் பள்ளிகளும், 3 நகராட்சி பள்ளிகளும், 2 சுயநிதி பள்ளிகளும், 21 மெட்ரிக் பள்ளிகளும் அடங்கும்.

அதிகரித்த தேர்ச்சி விகிதம்

பிளஸ் 2 பொதுத்தேர்வில் பொள்ளாச்சி கல்வி மாவட்டத்தில் 86.8 சதவீத மாணவ-மாணவியர் தேர்ச்சி பெற்றுள்ளனர். அரசு பள்ளி மாணவர்களுக்கு அளிக்கப்பட்ட சிறப்பு பயிற்சி, கல்வித்துறை அதிகாரிகளின் அதிரடி விசிட் ஆகியவை காரணமாக கடந்த ஆண்டை விட இந்தாண்டு அரசு பள்ளிகளின் தேர்ச்சி சதவீதம் அதிகரித்துள்ளது. ஆனாலும் ஒரு சில பள்ளிகளின் தேர்ச்சி சதவீதம் மிகவும் குறைந்துள்ளது.

மூன்று பள்ளிகள் சொதப்பல்

வால்பாறை மற்றும் கோட்டூர் பகுதியிலுள்ள பள்ளிகளின் தேர்ச்சி சதவீதம் 60-ஐக் கூடத் தொடவில்லை. வால்பாறை தாலுகாவுக்கு உட்பட்ட அட்டக்கட்டி அரசு மேல்நிலைப்பள்ளி தேர்ச்சி சதவீதம் கடந்த ஆண்டை விட இந்தாண்டு 33.68 சதவீதம் சரிந்துள்ளது. கோட்டூர் அரசு ஆண்கள் மேல் நிலைப்பள்ளியின் தேர்ச்சி சதவீதம் கடந்தாண்டுடன் ஒப்பிடும்போது 41.81 சதவீதம் குறைந்துள்ளது. முடீஸ் அரசு மேல் நிலைப்பள்ளியின் தேர்ச்சி சதவீதம் இந்தாண்டு 8.7 சதவீதம் குறைந்துள்ளது.

மொத்த கல்வி மாவட்டத்தில் இந்த மூன்று பள்ளிகள் மட்டும்தான் 50 சதவீதத்திற்கும் குறைவான தேர்ச்சியினைப் பெற்றுள்ளன.

நோட்டீஸ்

பிளஸ் 2 தேர்ச்சி சதவீதத்தில் 60 சதவீதத்திற்கு குறைவாக பெற்ற பள்ளிகளுக்கும், கடந்தாண்டை விட இந்தாண்டு தேர்ச்சி சதவீதம் குறைந்துள்ள பள்ளிகளுக்கும் விளக்கம் கேட்டு கல்வித்துறை சார்பில் நோட்டீஸ் அனுப்ப திட்டமிடப்பட்டுள்ளது என கல்வித்துறை அதிகாரிகள் தெரிவித்தனர்.

English summary

Education department has decided to send notice seeking explanation to those schools in Pollachi which have got poor results in +2 exams. Three schools in Pollachi have got less than 50% pass percentage.