10ம் வகுப்பு பொதுத்தேர்வு ஏப்ரல் 16ம் தேதி துவக்கம்

சென்னை: இந்த ஆண்டுக்கான 10ம் வகுப்பு பொதுத் தேர்வு வரும் ஏப்ரல் மாதம் 16ம் தேதி துவங்குகிறது என்று கூறப்படுகின்றது.

பத்தாம் வகுப்பு பொதுத்தேர்வு வழக்கமாக மார்ச் கடைசி வாரத்தில் துவங்கும். இந்த ஆண்டு சமச்சீர் கல்வி முறையை அமல்படுத்துவதில் ஏற்பட்ட தாமதத்தினால் 10ம் வகுப்பு பொதுத்தேர்வு வரும் ஏப்ரல் மாதம் 16ம் தேதி துவங்குகிறது என்று கூறப்படுகிறது. இதற்கான அதிகாரப்பூர்வமான அறிவிப்பு விரைவில் வெளியாகும் என்று எதிர்பார்க்கப்படுகிறது.

10 லட்சத்திற்கும் அதிகமான மாணவ-மாணவியர் பொதுத்தேர்வு எழுதுகின்றனர். இந்த ஆண்டு மெட்ரிக், ஆங்கிலோ இந்தியன் உள்ளிட்ட அனைத்து பள்ளி மாணவர்களுக்கும் ரூ. 115 தேர்வு கட்டணமாக நிர்ணயிக்கப்பட்டுள்ளது. ஏப்ரல் 16ம் தேதி துவங்கும் தேர்வு 27ம் தேதி வரை நடைபெறும் என்று தெரிகிறது.

சமச்சீர் பாடத்திட்டத்தை அறிமுகப்படுத்தியும் பள்ளிகளுக்கு புத்தகங்கள் கிடைக்க தாமதமானது. இதனால் 10ம் வகுப்பு மாணவர்களுக்கு இதுவரை 75 சதவீத பாடங்கள் தான் எடுத்து முடிக்கப்பட்டுள்ளது.

வழக்கமாக டிசம்பர் மாதத்தில் 10ம் வகுப்பு பாடகங்கள் அனைத்தும் முடிக்கப்பட்டு ஜனவரி முதல் மார்ச் முதல் வாரம் வரை தேர்வுகளும், திருப்புதல் தேர்வுகளும் நடக்கும். இந்த ஆண்டு ஜனவரி மாதம் கடைசி வாரம் அல்லது பிப்ரவரி மாதம் முதல் வாரத்தில் தான் பாடங்கள் முடிக்கப்படும் என்று தெரிகிறது.

சமச்சீர் பாடத்திட்டத்தின்படி இந்த ஆண்டு அனைத்து மாணவர்களும் அறிவியல் செய்முறைத் தேர்வு எழுத வேண்டும்.

செய்முறைத் தேர்வு நடத்தவும், செய்முறைத் தேர்வுக்கான பயிற்சியை மாணவர்களுக்கு வழங்கவும், திருப்புதல் தேர்வுகள் நடத்தவும் வசதியாக 10ம் வகுப்பு பொதுத்தேர்வை தள்ளிவைக்குமாறு மாவட்ட முதன்மைக் கல்வி அலுவலர்கள், மாவட்ட கல்வி அலுவலர்கள் பரிந்துரைத்திருந்தனர். அவர்கள் பரிந்துரையை ஏற்று தேர்வு 3 வாரங்கள் தள்ளிவைக்கப்பட்டுள்ளது.

தேர்வு அட்டவணையை அரசு பரிசீலித்து வருகிறது. இன்னும் ஓரிரு நாளில் தேர்வு அட்டவணை வெளியிடப்படும் என்று தெரிகிறது.

English summary

It is told that SSLC exams will start from april 16. The government will announce the exam dates in one or two days. Usually SSLC exam starts in the last week of march. The implementation of Samacheerkalvi is cited as the reason for the delay.