மனைவி அழகாக இல்லை என்று காதலியோடு சுற்றிய பேராசிரியையின் கணவர் கைது
சென்னை: மனைவி அழகாக இல்லை என்று காரணம் காட்டி, காதலியோடு உல்லாச வாழ்க்கையில் ஈடுபட்ட கணவன் மீது புதுச்சேரி கல்லூரி பேராசிரியை புகார் அளித்தார். இதன் பேரில் கணவர் கைது செய்யப்பட்டு சிறையில் அடைக்கப்பட்டார்.
சென்னை கொடுங்கையூர் முத்தமிழ் நகரை சேர்ந்தவர் இஸ்ரேல் விவேக் பிரசாத்(33). இவரது மனைவி மேரி சத்திய சுந்திரி(32). இவர் புதுச்சேரியில் கல்லூரி பேராசிரியையாக பணியாற்றி வருகிறார். இவர்களுக்கு ஒரு குழந்தை உள்ளது. இந்த நிலையில் சென்னை போலீஸ் கமிஷனர் அலுவலகத்தில் மேரி புகார் ஒன்றை அளித்துள்ளார்.
அதில் அவர் கூறியிருப்பதாவது,
எனக்கு திருமணமான நாளில் இருந்து கணவர், என்னை சித்ரவதை செய்து வருகிறார். நான் அழகாக இல்லை என்றும், குள்ளமாகவும், கறுப்பாகவும் இருப்பதாகவும் கூறி அடிக்கடி குத்தி காட்டுவார்.
திருமணத்தின் போது அவர் எம்எஸ்சி படித்திருப்பதாக கூறினார். ஆனால் +2 தான் படித்துள்ளார். மேலும் திருமணத்தின் போது வரதட்சணை எதுவும் வேண்டாம் என்றார். ஆனால் இப்போது 10 சவரன் நகைகளும், ரூ.2 லட்சம் பணமும் தர வேண்டும் என்கிறார்.நான் வாங்கும் சம்பளம் அனைத்தையும் அவரிடம் தான் தர வேண்டும் என்றும், சித்ரவதை செய்கிறார். என்னை படுக்கை அறைக்குள் அனுமதிப்பதில்லை, வெளியறையில் தான் நான் தூங்க வேண்டும்.
எப்படியோ அவரோடு சில காலம் வாழ்ந்த நான் கருவுற்றேன். அந்த கருவையும் கலைக்க வற்புறுத்தினார். குழந்தை என்னை போல கறுப்பாக பிறந்துவிடும் என்று அவர் சொன்னார். அவர் உச்சகட்டமாக சமையல் கியாசை திறந்துவிட்டு என்னை கொல்ல பார்த்தார்.
இப்போது எனது கணவர், அவரது காதலியோடு உல்லாசமாக இருக்கிறார். ஒரு பக்கம் என் உயிருக்கு ஆபத்து. இன்னொரு பக்கம் எனது வாழ்க்கையை இன்னொரு பெண் பகிர்ந்து கொண்டுவிட்டார். இதனால் நான் குழந்தையோடு வீட்டை விட்டு வெளியேறி, என் பெற்றோர் வீட்டுக்கு வந்துவிட்டேன். எனவே எனது கணவர் மீது சட்டபூர்வ நடவடிக்கை எடுக்க வேண்டுகிறேன் என்று அந்த புகார் மனுவில் தெரிவிக்கப்பட்டு இருந்தது.
இப்புகாரின் மீது சென்னை எம்.கே.பி.நகர் அனைத்து மகளிர் போலீஸ் இன்ஸ்பெக்டர் ஆரியமாலா வழக்கு பதிவு செய்து விசாரித்தார். இது தொடர்பாக இஸ்ரேல் விவேக் பிரசாத் கைது செய்யப்பட்டார். இது குறித்து போலீசார், இஸ்ரேல் விவேக் பிரசாத்திடம் விசாரித்தனர். மேலும் நீதிமன்றத்தில் ஆஜர்படுத்தப்பட்டு, சிறையில் அடைக்கப்பட்டார்.
Click it and Unblock the Notifications
Sign in with Google