'கறுப்பு பொங்கல்' ரத்து ...ஏழைகளுக்கு பொங்கல் பொருள் கொடுக்க 'கறுப்பு எம்.ஜி.ஆர்.' முடிவு

By Mayura Akilan

Updated: Wednesday, January 9, 2013, 8:56 [IST]

Subscribe to Oneindia Tamil

சென்னை: இந்த ஆண்டுப் பொங்கலை கறுப்பு பொங்கலாக தேமுதிக அனுசரிக்கும் என்று அறிவித்திருந்த நிலையில் அதனை திரும்பப் பெற்றுள்ளார் விஜயகாந்த் அதற்கு பதிலாக ஏழைகளுக்கு பொங்கல் பொருட்கள் வழங்கப்படும் என்று அவர் அறிவித்துள்ளார். இது குறித்து அவர் வெளியிட்டுள்ள அறிக்கையில் கூறியிருப்பதாவது:

சமுதாய நல்லிணக்கத்தைப் போற்றும் வகையில் ஒவ்வொரு ஆண்டும் ஹிந்து, கிறிஸ்தவம், இஸ்லாம் பண்டிகைகளை மக்களுடன் இணைந்து தேமுதிக கொண்டாடி வருகிறது.

உழைக்கும் மக்களுக்கு உறுதுணையாக இருக்கும் இயற்கைக்கும், உயிரினங்களுக்கும் நன்றி தெரிவிக்கும் திருநாளே பொங்கல் பண்டிகை.

மக்கள் பிரச்னைகளை தீர்ப்பதற்கு தான் அரசாங்கம் உள்ளது. ஆனால், இன்றைய அரசின் தவறான அணுகுமுறையாலும், மத்திய அரசுடனும், அண்டை மாநிலங்களோடும் சுமுகமான உறவு இல்லாததாலும் காவிரியில் தண்ணீர் பெற்றுத்தர முடியவில்லை.காவிரியில் இருந்து எந்த அளவுக்கு தண்ணீர் கிடைக்கும் என்பதை முன்கூட்டியே அறிவித்திருந்தால் விவசாயிகள் பயிர் சாகுபடியைக் குறைத்து கடன் தொல்லைகளுக்கு ஆளாகாமல் இருந்திருப்பார்கள். விவசாயிகளுக்கு 12 மணி நேரம் மும்முனை மின்சாரம் வழங்கப்படும் என்ற அறிவிப்பும் நிறைவேற்றப்படவில்லை.

இதனால் பாதிக்கப்பட்ட விவசாயிகள் தங்கள் வாழ்வாதாரத்துக்காக போராட்டங்களை நடத்தி வருகின்றனர். இந்நிலையில் பாதிக்கப்பட்ட விவசாயிகளுக்கும், ஏழைகளுக்கும் முடிந்த உதவிகளை செய்வதுதான் மனிதாபிமானம் ஆகும்.தேமுதிக சார்பில் தஞ்சாவூர் நாஞ்சிக்கோட்டை சாலை பாத்திமா நகரில் வரும் ஜனவரி 11-ம் தேதி நடைபெறும் பொங்கல் விழா பொதுக்கூட்டத்தில் ஏழைகளுக்கு பொங்கல் பொருள்கள் வழங்கப்படும். இவ்விழாவில் பயிர் கருகியதால் தற்கொலை செய்து கொண்ட 12 விவசாயிகளின் குடும்பங்களுக்கு தலா ரூ. 25 ஆயிரம் வழங்கப்படும்.

இதுபோல மாவட்டச் செயலாளர்கள் உள்ளிட்ட தேமுதிக நிர்வாகிகள் அனைவரும் தங்களது பகுதிகளில் ஏழைகளுக்கு பொங்கல் பொருள்களை வழங்க வேண்டும் என அந்த அறிக்கையில் விஜயகாந்த் கேட்டுக் கொண்டுள்ளார்.