இந்திய மாணவி மேகனா ராவுக்கு விருது: ஒபாமா பெருமை

நியூயார்க்: போர்ட்லேண்ட் இளம் ஆராய்ச்சியாளர்கள்' அமைப்பை ஏற்படுத்தி பிற மாணவர்களுக்கு உதவி வரும் இந்திய வம்சாவழி மாணவி மேகனா ராவுக்கு விருது அறிவிக்கப்பட்டுள்ளது. இது குறித்து அதிபர் ஒபாமா பெருமை தெரிவித்துள்ளார்.

அமெரிக்காவில் படிக்கும் மாணவ-மாணவிகளின் அறிவியல் ஆராய்ச்சியின் ஆர்வத்தை ஊக்குவிக்கும் வகையில் ஆண்டுதோறும் அதிபரின் வெள்ளை மாளிகையில் அறிவியல் கண்காட்சி நடத்தப்பட்டுவருகிறது.

இந்த ஆண்டு நடைபெற்ற கண்காட்சியில் இந்திய வம்சாவழி மாணவி மேகனா ராவுக்கு விருது அறிவிக்கப்பட்டுள்ளது.

இந்திய வம்சாவழி மாணவி :

ஆரேகான் பகுதியில் வசித்து வரும் இந்திய வம்சா வழியை சேர்ந்த 17 வயது மாணவி மேகனா ராவ் பங்கேற்றார்.

சார்க்கோல் புராஜக்ட் :

சார்க்கோல் (மரக்கரி) தொடர்பாக அவர் வெளியிட்ட 'புராஜெக்ட்' அறிக்கையை பார்த்து வியந்த அமெரிக்க அதிபர் ஒபாமா, மேகனா ராவை வெகுவாக பாராட்டினார்.

தொடர்ந்து முயற்சி செய் :

அவரை அருகில் அழைத்து கை குலுக்கி வாழ்த்து தெரிவித்த ஒபாமா 'உன்னால் நாங்கள் மிகவும் பெருமைப்படுகிறோம். இந்த நல்ல முயற்சியை தொடர்ந்து செய்' என்று கூறினார்.

'போர்ட்லேண்ட் இளம் ஆராய்ச்சியாளர்கள்' அமைப்பு :

அமெரிக்க இயன்முறை வரலாறு அருங்காட்சியகத்தின் சிறந்த விருதினைப் பெற்றுள்ள மேகனா ராவ், 'போர்ட்லேண்ட் இளம் ஆராய்ச்சியாளர்கள்' என்ற அமைப்பை ஏற்படுத்தி, இதர மாணவர்களுடன் இணைந்து மரக்கரியின் பயன்கள் குறித்து ஆய்வு செய்து வருகிறார்.

பொருளாதார நெருக்கடி சமயங்களில் :

2011-ம் ஆண்டு அமெரிக்கா கடுமையான பொருளாதார நெருக்கடியை சந்தித்தபோது, பள்ளி மற்றும் கல்லூரி மாணவர்களின் அறிவியல் ஆராய்ச்சிக்காக அரசின் சார்பில் வழங்கப்படும் நிதி நிறுத்தி வைக்கப்பட்டது.

நிதி உதவி :

இந்நிலையில், அறிவியல் ஆராய்ச்சிக்கென போர்ட்லேண்ட் இளம் ஆராய்ச்சியாளர்கள் என்ற அமைப்பை ஏற்படுத்தி மாணவ-மாணவிகள் வெளி பள்ளிகள் மற்றும் அறிவியல் கண்காட்சிகளுக்கு சென்று பார்வையிட்டு தங்களின் அறிவியல் அறிவை வளர்த்துக் கொள்ள மேகனா ராவ் உதவிகரமாக இருந்து வந்துள்ளார்.

யங் நேச்சரலிஸ்ட் விருது :

இவரது தீவிரமான முயற்சியின் விளைவாக மேகனா ராவுக்கு இளம் இயன்முறையாளர் (யங் நேச்சரலிஸ்ட்) விருதும், பெப்சி நிறுவனத்தின் 5 ஆயிரம் அமெரிக்க டாலர்கள் உதவிப்பணமும், மற்றொரு நிறுவனத்திடமிருந்து 11 ஆயிரத்து 500 டாலர்கள் உதவிப்பணமும் கிடைத்துள்ளது என வெள்ளை மாளிகை அறிவித்துள்ளது.

English summary

US President Barack Obama has praised a 17-year-old Indian-American student for her science project at the third annual White House science fair here.