கர்நாடக தேர்தல்.. மொத்த தொகுதிகள் எத்தனை.. கடந்த தேர்தல் வெற்றி கட்சிவாரியாக இதோ

பெங்களூர்: கர்நாடகா சட்டசபைக்கு இந்த ஆண்டு தேர்தல் நடத்தப்படும் நிலையில் அங்குள்ள கட்சிகளின் தற்போதைய பலம் என்ன என்பதை பார்ப்போம்.

கர்நாடகாவுக்கு கடந்த 2018 ஆம் ஆண்டு சட்டசபை தேர்தல் நடந்தது. மொத்தம் 224 தொகுதிகளில் 222 தொகுதிகளுக்கு மட்டும் தேர்தல் நடந்தது. ஜெயாநகர், ராஜராஜேஸ்வரி நகர் ஆகிய இரு தொகுதிளுக்கும் தேர்தல் ஒத்தி வைக்கப்பட்டது.

இந்த தேர்தலில் பெரும்பான்மை பலம் 112 ஆகும். ஆனால் தேர்தலில் பாஜக 104 இடங்களிலும் காங்கிரஸ் கட்சி 80 இடங்களிலும் குமாரசாமியின் ஜேடிஎஸ் கட்சி 37 இடங்களிலும் வென்றது. இதனால் யாருக்கும் பெரும்பான்மை இல்லாத நிலை ஏற்பட்டது.

அவசரம்

இதையடுத்து அவசரமாக காங்கிரஸ் நிர்வாகிகளுடன் ஆலோசனை நடத்திய சோனியா காந்தி, கூட்டணி அமைத்து பாஜக ஆட்சிக்கு வருவதை தடுக்கும் வகையில் 80 இடங்களில் வென்றிருந்தாலும் ஜேடிஎஸ்ஸை அணுகி நாங்கள் உங்களுக்கு நிபந்தனையற்ற ஆதரவு அளிக்கிறோம். நீங்களே முதல்வராக இருங்கள். நாம் கூட்டணி ஆட்சியை நடத்தலாம் என தெரிவித்திருந்தார்.

அதிக இடங்களில்

இதனிடையே பாஜக அதிக இடங்களில் வென்றதால் பாஜகவை ஆட்சி அமைக்க ஆளுநர் அழைப்பு விடுத்தார். அதன்பேரில் முதல்வராக எடியூரப்பாவும் பதவியேற்றுக் கொண்டார். ஆனால் இதை எதிர்த்து எதிர்க்கட்சிகள் உச்சநீதிமன்றம் வரை சென்றன. இதையடுத்து எடியூரப்பா பெரும்பான்மையை நிரூபிக்க 15 நாட்கள் கால அவகாசம் வழங்கியிருந்தார் ஆளுநர்.

உச்சநீதிமன்றம்

உச்சநீதிமன்றமும் வாக்கெடுப்பை உடனே நடத்த உத்தரவிட்டிருந்தது. எனினும் எடியூரப்பாவால் பெரும்பான்மையை நிரூபிக்க முடியவில்லை. இதையடுத்து பதவியேற்ற 3 நாட்களில் எடியூரப்பா தனது பதவியை ராஜினாமா செய்தார். ஜேடிஎஸ் காங்கிரஸ் ஆதரவுடன் ஆட்சி அமைக்க உரிமை கோரியது. அதன் பேரில் சட்டசபையில் பெரும்பான்மையை குமாரசாமி நிரூபித்தார். பின்னர் ஜேடிஎஸ்- காங்கிரஸ் கூட்டணி ஆட்சிக்கு வந்தது.

பாஜக சதி

எனினும் தனது ஆட்சியை கலைக்க பாஜக சதி செய்வதாக பல முறை அப்போதைய முதல்வர் குற்றம்சாட்டினார். இந்த நிலையில் குமாரசாமியின் ஆட்சி ஓராண்டு நிறைவடைந்தது. அதில் மஜத (ஜேடிஎஸ்)- காங்கிரஸ் எம்எல்ஏக்கள் 16 பேர் ராஜினாமா செய்தனர். இதையடுத்து சட்டசபையில் நம்பிக்கை வாக்கெடுப்பு நடத்தப்பட்டது. அப்போது குமாரசாமி பெரும்பான்மையை நிரூபிக்க முடியாததால் அவருடைய ஆட்சி கவிழ்க்கப்பட்டது.

சட்டசபையில் பெரும்பான்மை

இதையடுத்து மீண்டும் சட்டசபையில் பாஜக பெரும்பான்மையை நிரூபித்தது. அப்போது பாஜகவின் பலம் 122 ஆக இருந்தது. எடியூரப்பா பெரும்பான்மையை நிரூபித்து ஆட்சிக்கு வந்தார். பின்னர் அவருடைய வயது மூப்பு காரணமாக அவர் முதல்வர் பதவியிலிருந்து விலகி அவருக்கு பதிலாக பசவராஜ் பொம்மை முதல்வராக பதவியேற்று தொடர்ந்து ஆட்சியை நடத்தி வருகிறார்.

224 தொகுதிகளுக்கு போட்டி

கர்நாடகா சட்டசபைக்கு இந்த ஆண்டு தேர்தல் நடைபெறவுள்ளது. மொத்தம் 224 தொகுதிகளுக்கு வழக்கம் போல் மும்முனை போட்டி நிலவி வருகிறது. அந்த 3 கட்சிகளுடன் தற்போது ஆம் ஆத்மியும் சேர்ந்துவிட்டது. இந்த தேர்தலில் போட்டியிட முடிவு செய்துள்ளார். இப்படியிருக்கும் போது கர்நாடகா சட்டசபையில் பாஜகவின் தற்போதைய பலம் 119 ஆகும். அது போல் காங்கிரஸ் கட்சியின் பலம் 75 ஆகும். கூட்டணி கட்சியான ஜேடிஎஸ் கட்சிக்கு 28 எம்எல்ஏக்கள் இருக்கிறார்கள்.

பிரச்சாரம்

தற்போது நடைபெறும் தேர்தலில் எந்த கட்சி பெரும்பான்மை பலத்துடன் ஆட்சியை பிடிக்கும் என்ற எதிர்பார்ப்பு எழுந்துள்ளது. கருத்துக் கணிப்புகள் காங்கிரஸ் கட்சி ஆட்சி அமைக்கும் என கூறி வரும் நிலையில் இந்த சட்டசபை தேர்தலில் எந்த கட்சியாவது பெரும்பான்மை பலத்துடன் ஆட்சியை பிடிக்குமா இல்லை கடந்த முறை போல் தொங்கு சட்டசபை அமையுமா என்ற கேள்வியும் எழுந்துள்ளது.

English summary

Current strength: The 224-seat-strong Karnataka Assembly currently has 119 MLAs of the BJP, while Congress has 75 and its ally JD(S) has 28 seats.