போச்சே.. சாப்பாடு, காய்கறின்னு எல்லாத்தையும் பார்சல் போடுவோமே! 75% ஊழியர்களை நீக்கியது டன்சோ கம்பெனி
பெங்களூர்: பெங்களூரை தலைமையிடமாக கொண்ட டெலிவரி நிறுவனமான டன்சோ (Dunzo) நிதி நெருக்கடியில் சிக்கி தவித்து வருகிறது. இதன் காரணமாக செலவுகளைக் குறைத்து, நிதி ஆதாரத்தை மேம்படுத்த திட்டமிட்டு, தனது ஊழியர்களில் 75% (150 பேர்) பேரை பணிநீக்கம் செய்துள்ளது.
மளிகைப்பொருட்கள் டெலிவரி, சமையல் செய்து தெரிந்தவர்களுக்கு அனுப்பி வைத்தல், காய்கறி, மட்டன், சிக்கன் என பல விஷயங்களையும் சிட்டிக்குள்ளேயே டெலிவரி செய்ய டன்சோ பயன்பட்டு வந்தது. ஆனால் சமீப காலமாக இந்த நிறுவனம் நிதி நெருக்கடியில் சிக்கியிருந்தது.
டன்சோ நிறுவனம் மீதுள்ள நிதி பிரச்சினைகளை சமாளிக்க போராடும் நிலையில், செலவுகளைக் குறைத்து பணப்புழக்கத்தை அதிகரிக்க புது வியூகங்களை கையில் எடுத்துள்ளது. இதன் காரணமாக, இந்த பணி நீக்க நடவடிக்கை எடுக்கப்பட்டுள்ளதாக தகவல்கள் தெரிவிக்கின்றன. ஊழியர்களுக்கும், விற்பனையாளர்களுக்கும் உள்ள நிலுவைத் தொகைகளை செலுத்துவதில் சிக்கல் இருந்ததே இதற்கான முக்கிய காரணம்.
வேலைவாய்ப்பு இழப்பைக் கண்காணிக்கும் ஒரு இணையதளத்தின் தகவல்படி, இந்த பணி நீக்கம் ஆகஸ்ட் 31, 2024 அன்று செய்யப்பட்டுள்ளது. பணி நீக்கம் செய்யப்பட்ட ஊழியர்களுக்கு மின்னஞ்சல் மூலம் தகவல் தெரிவிக்கப்பட்டுள்ளது. மேலும், தங்களுக்கு தேவையான நிதி கிடைத்ததும், வேலையிலிருந்து நீக்கப்பட்ட பாதிக்கப்பட்ட ஊழியர்களுக்கு நிலுவை சம்பளங்கள், சர்வீஸ் கட்டணம், விடுப்பு பணம் மற்றும் பிற பாக்கித் தொகைகள் செலுத்தப்படும் என்று டன்சோ நிறுவனம் உறுதியளித்துள்ளது.
டன்சோ நிறுவனம் பல மாற்றங்கள் மற்றும் சவால்களைச் சந்தித்துள்ளது. ஒரு கட்டத்தில் $775 மில்லியன் மதிப்புடையதாக இந்த நிறுவனம் உருவெடுத்தது. ஆனால் சமீப காலங்களில் நிதி திரட்டுவதில் பெரும் சிரமத்தைச் சந்தித்து வருகிறது.
மே 2024 இல், புதிய மற்றும் தற்போதுள்ள முதலீட்டாளர்களிடமிருந்து பங்கு மற்றும் கடன் ஆகியவற்றின் கலவையாக ₹22-25 கோடி நிதி திரட்டும் தருவாயில் இருந்ததாக செய்திகள் தெரிவிக்கின்றன. ஆனால், இந்த ஒப்பந்தம் கைகூடவில்லை. நிதி திரட்டும் இறுதி கட்டத்தில் இருப்பதாகவும் 10-15 நாட்களுக்குள் நிலுவைத் தொகைகளைச் செலுத்த எதிர்பார்ப்பதாகவும் டன்சோ நிறுவனம் தனது ஊழியர்களுக்குத் தெரிவித்திருந்தது. ஆனால், அதற்கடுத்த மின்னஞ்சல்களை வைத்து பார்த்தால் நிதி கிடைப்பதில் தொடர்ந்து தாமதம் ஏற்பட்டது உறுதி செய்யப்பட்டுள்ளன.
எதிர்காலத்தில் லாபகரமான வளர்ச்சிக்காகவும், இதுபோன்ற சவாலான காலகட்டங்களை எதிர்கொள்ளவும் இது அவசியமான நடவடிக்கையாக பார்க்கப்படுகிறது. டன்சோ நிறுவனம் இந்த நிதி சிக்கல்களில் இருந்து மீண்டு வருமா என்பதை பொறுத்திருந்து பார்ப்போம்.
Click it and Unblock the Notifications
Sign in with Google