பாஜக கூட்டணி: சுக்கு சுக்காக உடையும் கர்நாடகா குமாரசாமி கட்சி- மாநில தலைவர் இப்ராஹிம் போர்க்கொடி!

பெங்களூர்: லோக்சபா தேர்தலுக்காக பாஜக தலைமையிலான தேசிய ஜனநாயகக் கூட்டணியில் மதச்சார்பற்ற ஜனதா தளம் கட்சி (ஜேடிஎஸ்) (JDS) இணைந்ததற்கு அக்கட்சியின் கர்நாடகா மாநிலத் தலைவர் சி.எம். இப்ராஹிம் கடும் எதிர்ப்பு தெரிவித்துள்ளார்.

கர்நாடகா சட்டசபை தேர்தலில் பெரும் தோல்வியை சந்தித்தது மதச் சார்பற்ற ஜனதா தளம். இதனால் வரும் லோக்சபா தேர்தல் அக்கட்சிக்கு வாழ்வா? சாவா? என்கிற நிலைமைதான்.

பாஜக கூட்டணியில் ஜேடிஎஸ்: இதனால் வேறுவழியே இல்லாமல் பாஜக தலைமையிலான தேசிய ஜனநாயகக் கூட்டணியில் மதச்சார்பற்ற ஜனதா தளம் கட்சி இணைந்தது. டெல்லிக்கு சென்ற கர்நாடகா முன்னாள் முதல்வர் குமாரசாமி, மத்திய உள்துறை அமைச்சர் அமித்ஷா, பாஜக தலைவர் ஜேபி நட்டாவை சந்தித்து பேசினார். இந்த சந்திப்பைத் தொடர்ந்து தேசிய ஜனநாயகக் கூட்டணியில் மதச்சார்பற்ற ஜனதா தளம் இணைந்தது.

பாஜக கூட்டணிக்கு எதிர்ப்பு: ஆனால் மதச்சார்பற்ற ஜனதா தளம் கட்சியின் இந்த முடிவுக்கு அக்கட்சியின் பெரும்பாலான முஸ்லிம் தலைவர்கள், தொண்டர்கள் கடும் எதிர்ப்பு தெரிவித்துள்ளனர். ஏற்கனவே அக்கட்சியில் இருந்து ஏராளமான முஸ்லிம் தலைவர்கள் விலகிவிட்டனர். மேலும் சில எம்.எல்.ஏக்கள் காங்கிரஸ் கட்சிக்கு தாவப் போவதாகவும் கூறப்பட்டது. அதே நேரத்தில் மதச்சார்பற்ற ஜனதா தளம் கட்சியின் மாநிலத் தலைவர் சிஎம் இப்ராஹிம் நிலைப்பாடு என்ன என்பது தெரிவிக்கப்படாமல் இருந்தது.

ஜேடிஎஸ் மாநில தலைவர் இப்ராஹிம்: இந்நிலையில் இன்று பெங்களூரில் செய்தியாளர்களை சிஎம் இப்ராஹிம் சந்தித்தார். இந்த சந்திப்பின் போது சிஎம் இப்ராஹிம் கூறியதாவது: மதச் சார்பற்ற ஜனதா தளம் கட்சியின் மாநிலத் தலைவர் நான். ஆனால் டெல்லிக்கு சென்று பாஜக கூட்டணியில் இணைந்தது குறித்து எனக்கு எந்த தகவலும் தெரிவிக்கப்படவில்லை. இந்த விவகாரம் குறித்து எனக்கு திட்டமிட்டே கட்சி தலைமை தெரிவிக்கவும் இல்லை.

பாஜக கூட்டணியால் அதிருப்தி: ஒரு கூட்டணியில் இணைவது என்றால் கட்சியில் அதிகாரப்பூர்வமாக தீர்மானம் நிறைவேற்றப்பட வேண்டும். இந்த தீர்மானத்துக்கு கட்சி நிர்வாகிகள் கையெழுத்திட வேண்டும். மாநில தலைவராகிய நானும் கையெழுத்திட வேண்டும். ஆனால் இந்த நடைமுறை எதுவுமே பின்பற்றப்படவில்லை. இது எங்களை கடுமையாக காயப்படுத்தி இருக்கிறது.

அக்.16-ல் முடிவு அறிவிப்பு: பாஜகவுடனான கூட்டணியை எதிர்க்கும் ஒத்த கருத்துள்ள கட்சித் தலைவர்கள் அனைவரும் அக்டோபர் 16-ந் தேதி பெங்களூரில் ஒன்று கூடி விவாதிக்க இருக்கிறோம். அதன்பின்னரே எங்கள் முடிவை தேவகவுடா, குமாரசாமியை நேரில் சந்தித்து விளக்கி பொதுமக்களிடம் தெரிவிப்போம். இதுவரை குமாரசாமி, தேவகவுடாவை சந்திக்கவில்லை.

"இந்தியா" கூட்டணியில் ஐக்கியம்?: பாஜக கூட்டணியில் மதச்சார்பற்ற ஜனதா தளம் இணைந்துவிட்ட நிலையில் தேசியவாத காங்கிரஸ் தலைவர் சரத்பவார், பீகார் முதல்வர் நிதிஷ்குமார் உள்ளிட்டோர் எங்களை தொடர்பு கொண்டுள்ளனர். ஆனால் அக்டோபர் 16-ந் தேதிக்குப் பின்னர் எங்களது முடிவை தெரிவிப்போம் என கூறியிருக்கிறோம்.

முஸ்லிம்கள் வாக்கு வங்கி: மதச்சார்பற்ற ஜனதா தளத்திடம் இருந்து முஸ்லிம்கள் விலகிப் போய்விடவில்லை. முஸ்லிம்களின் 20% வாக்குகளை மதச்சார்பற்ற ஜனதா தளம் பெற்றிருக்கிறது. சன்னபட்னா சட்டசபை தொகுதியில் முஸ்லிம்களின் வாக்குகளால்தான் தாம் வென்றதாக குமாரசாமியே தெரிவித்திருந்தார். இவ்வாறு சிஎம் இப்ராஹிம் தெரிவித்துள்ளார்.

English summary

JDS Karnataka President C.M. Ibrahim Strongly Opposed to alliance with BJP