கர்நாடகா சட்டசபை தேர்தல்: இழுபறிக்குப் பின் 42 வேட்பாளர்களுடன் காங். 2-ம் கட்ட பட்டியல் வெளியானது!

பெங்களூர்: கர்நாடகா சட்டசபை தேர்தலில் போட்டியிடும் காங்கிரஸ் வேட்பாளர்களின் 2-வது பட்டியல் வெளியிடப்பட்டுள்ளது. இதில் 42 வேட்பாளர்கள் இடம்பெற்றுள்ளனர்.

கர்நாடகாவில் மே 10-ந் தேதி வாக்கு பதிவு நடைபெற்று, மே 13-ந் தேதி வாக்கு எண்ணிக்கை நடைபெறுகிறது.

224 இடங்களைக் கொண்ட கர்நாடகா சட்டசபை தேர்தலில் 124 தொகுதிகளுக்கான வேட்பாளர்களை காங்கிரஸ் ஏற்கனவே அறிவித்துள்ளது.

இதனைத் தொடர்ந்து 93 இடங்களுக்கான 2-ம் கட்ட வேட்பாளர் பட்டியல் வெளியிடப்படும் என அறிவிக்கப்பட்டிருந்தது. ஆனால் பல்வேறு குழப்பங்களால் சில தொகுதிகளுக்கான வேட்பாளர்களை இறுதி செய்ய முடியாத நிலை ஏற்பட்டதாம்.

இந்நிலையில் காங்கிரஸ் கட்சியின் மத்திய தேர்தல் குழு இன்று மீண்டும் கூடி ஆலோசனை நடத்துகிறது. இந்த ஆலோசனைக் கூட்டத்துக்குப் பின் 2-ம் கட்ட வேட்பாளர் பட்டியல் வெளியாகும் என கூறப்படுகிறது.

இது தொடர்பாக கர்நாடகா மாநில காங்கிரஸ் கமிட்டித் தலைவர் டிகே சிவகுமார் கூறுகையில், தேர்தல் தொடர்பான குழு மீண்டும் கூடுகிறது. வேட்பாளர்களை எவ்வளவு விரைவாக அறிவிக்க முடியுமோ அவ்வளவு விரைவாக அறிவித்துவிடுவோம் என்றார்.

தற்போது வேட்பாளர் பட்டியலில் இழுபறி தொடருவதால் எஞ்சிய 100 தொகுதிகளுக்கும் ஒரே கட்டமாக வேட்பாளர்களை காங்கிரஸ் மேலிடம் அறிவிக்கக் கூடும் எனவும் கூறப்பட்டது. ஆனால் இன்று 42 வேட்பாளர்களை கொண்ட 2-வது வேட்பாளர் பட்டியலை காங்கிரஸ் கட்சி அறிவித்துள்ளது.

3 முறை எம்.எல்.ஏ.வாக இருந்த முன்னாள் பாஜக எம்.எல்.சி பாபுராவ் சின்சன்சூருக்கு குர்மிட்கல் தொகுதியில் போட்டியிட சீட் கொடுக்கப்பட்டுள்ளது. சித்தராமையா முன்னர் போட்டியிட்ட பதாமி தொகுதியில் பீமசென் சிம்மன்னகட்டி வேட்பாளராக நிறுத்தப்பட்டுள்ளார். பாகல்கோட்டில் ஹூல்லப்ப மெதி, மாண்டியாவில் ரவிக்குமார், கொள்ளேகாலில் ஏஆர் கிருஷ்ணமூர்த்தி ஆகியோர் வேட்பாளர்களாக அறிவ்க்கப்பட்டுள்ளனர்.

மேலும் கிட்டூர்- பாபாசாகேப் டி பாட்டீல், முதொல்- ராமப்பா பாலப்ப திம்மாபூர், பீஜப்பூர் நகரம்- அப்துல் ஹமீத், பத்மநாப நகர்- ரகுநாத நாயுடு, யெலகங்கா- கேசவ ராஜண்ணா, யஷ்வந்தபுர- எஸ் பால்ராஜ் கவுடா ஆகியோர் வேட்பாளர்களாக அறிவிக்கப்பட்டிருக்கின்றனர்.

முன்னதாக காங்கிரஸ் கட்சி வெளியிட்ட 124 வேட்பாளர்கள் பட்டியலில் மூத்த தலைவர்கள் இடம்பெற்றிருந்தனர். வருணா தொகுதியில் சித்தராமையா, கனகபுராவில் டிகே சிவகுமார், கோரடகெரேவில் ஜி பரமேஸ்வரா, பாபலேஸ்வரில் எம்பி பாட்டீல், சிதாப்பூரில் கார்கே மகன் பிரியங் கார்கே, காந்தி நகரில் தினேஷ் குண்டுராவ் ஆகியோரது பெயர்கள் இடம்பெற்றிருந்தன.

English summary

Ahead of Karnataka Assembly Election 2023, Congress will release second list of candidates today.