'3,000 ப்ளூ பிலிம்' பிரஜ்வல்-க்கு எதிராக ப்ளூ கார்னர் நோட்டீஸ்-வெளிநாடுகளில் வலை வீசி தேடும் போலீஸ்!

பெங்களூர்: 300 பெண்களை நாசமாக்கி 3,000 ஆபாச வீடியோக்கள் (ப்ளூ பிலிம்) எடுத்த வழக்கில் முக்கிய குற்றவாளியான கர்நாடகா ஹாசன் தொகுதி எம்பியும் அத்தொகுதியில் தற்போதைய லோக்சபா தேர்தலில் போட்டியிட்டுள்ள வேட்பாளருமான பிரஜ்வல் ரேவண்ணாவுக்கு எதிராக இண்டர்போல் மூலம் ப்ளூ கார்னர் (புளூர் கார்னர்) நோட்டீஸ் பிறப்பிக்கப்பட்டுள்ளதால் வெளிநாடுகளில் தீவிர தேடுதல் வேட்டை நடைபெறுகிறது.

கர்நாடகா ஹாசன் லோக்சபா தொகுதி எம்பியும் ஜேடிஎஸ் கட்சியில் இருந்து சஸ்பெண்ட் செய்யப்பட்டவருமான பிரஜ்வல் ரேவண்ணா, அவரது தந்தை ரேவண்ணா மீது பலாத்கார வழக்குகள் பதியப்பட்டுள்ளன. கர்நாடகா சிறப்பு புலனாய்வுக் குழு இந்த வழக்கு விசாரணையை நடத்தி வருகிறது. இவ்வழக்குகளில் ரேவண்ணா கைது செய்யப்பட்டுள்ளார். பிரஜ்வல் ரேவண்ணா வெளிநாடு தப்பி ஓடிவிட்டார்.

பிரஜ்வல் ரேவண்ணா மீது தொடர்ந்து பலாத்கார புகார்களை பெண்கள் கொடுத்து வருகின்றனர். இதனால் வெளிநாட்டுக்கு தப்பிப் போன பிரஜ்வல் ரேவண்ணாவை கைது செய்ய நடவடிக்கைகள் எடுக்கப்பட்டுள்ளன. முதலில் லுக் அவுட் நோட்டீஸ் பிறப்பிக்கப்பட்டது. பின்னர் சிபிஐ, இண்டர்போல் மூலம் ப்ளூ கார்னர் நோட்டீஸ் பிறப்பிக்கப்பட்டுள்ளது.

உலகில் உள்ள அனைத்து நாடுகளுக்கும் பிரஜ்வல் ரேவண்ணாவுக்கு எதிரான ப்ளூ கார்னர் நோட்டீஸ் அனுப்பி வைக்கப்பட்டுள்ளது. அனைத்து நாடுகளிலும் பிரஜ்வல் ரேவண்ணா வலை வீசி தேடப்பட்டு வருகிறார். அதாவது பிரஜ்வல் ரேவண்ணா எல்லைப் பகுதிகளில் இருந்தாலோ, விமான நிலையங்களில் வந்திறங்கினாலோ உடனே கர்நாடகா சிறப்புப் புலனாய்வுக் குழுவுக்கு தகவல் தெரிவிக்க வேண்டும் என ப்ளூ கார்னர் நோட்டீஸ் அனுப்பி வைக்கப்பட்டுள்ளது.

கடந்த சில நாட்களுக்கு துபாயில் பதுங்கி இருந்த பிரஜ்வல் ரேவண்ணா, கர்நாடகாவின் மங்களூர் விமான நிலையம் வரப்போவதாக தகவல் கிடைத்தது. இதனால் மங்களூர் விமான நிலையத்திலேயே பிரஜ்வலை கைது செய்ய போலீசார் நாள் முழுவதும் காத்திருந்தனர். ஆனால் பிரஜ்வல் மங்களூர் வரவில்லை. அத்துடன் பெங்களூர் விமான நிலையத்திலும் பிரஜ்வல் ரேவண்ணாவை கைது செய்ய போலீசார் காத்திருந்தும் வீணாணது.

இதனிடையே பிரஜ்வல் ரேவண்ணாவின் ஆபாச வீடியோக்கள் வெளியான விவகாரத்தில் மூளையான அவரது ஓட்டுநர் கார்த்திக் கவுடா தொடர்ந்தும் மலேசியாவிலேயே இருப்பதாகவும் கூறப்படுகிறது.

English summary

Interpol has issued a Blue Corner Notice against Hassan MP Prajwal Revanna.