‛‛டவுன் பஸ்ஸை விட மோசம்’’.. சோஷியல் மீடியாவில் விவாதமான விமானத்தின் இருக்கைகள்.. இண்டிகோ விளக்கம்
பெங்களூர்: பெங்களூரிலிருந்து போபால் சென்ற இண்டிகோ விமானத்தில், பயணிகள் அமரும் இருக்கையில் குஷன் இல்லாமல் இருந்த சம்பவம் பெரும் சலசலப்பை ஏற்படுத்தியுள்ளது. இது தொடர்பான புகைப்படங்கள் சோஷியல் மீடியாக்களில் வேகமாக பரவிய நிலையில், இண்டிகோ நிறுவனம் விளக்கமளித்திருக்கிறது.
பயணங்களிலேயே விமான பயணம்தான் மிகச்சிறந்தது என்கிற தோற்றம் மக்கள் மத்தியில் இருக்கிறது. ஆனால் இந்த எண்ணத்தை சுக்குநூறாக உடைக்கும் வகையில் பல சம்பவங்கள் விமான பயணத்தில் நடந்திருக்கிறது. அதில் ஒன்று தற்போது பெங்களூரில் சமீபத்தில் நடந்திருக்கிறது.
அதாவது பயணி ஒருவர் பெங்களூரிலிருந்து மத்தியப் பிரதேச தலைநகர் போபாலுக்கு போக இண்டிகோ விமானத்தில் ஏறியிருக்கிறார். பின்னர் தனக்கான இருக்கையை கண்டுபிடித்து உட்கார்ந்திருக்கிறார். ஆனால், இவருக்கு வலதுபுறம் எதிரே உள்ள சீட்டில் குஷன் இல்லாமல் இருந்திருக்கிறது. ஆயிரக்கணக்கில் செலவழித்து விமானத்தில் வந்தால், இப்படி டவுன் பஸ்ஸை போல விமானத்தை வச்சியிருக்கீங்களே என்று ஆதங்கப்பட்டு, குஷன் இல்லாத சீட்டை ஃபோட்டோ எடுத்து அந்த பயணி x தளத்தில் பதிவிட்டுள்ளார்.
அவ்வளவுதான் x தளம் மட்டுமல்லாது, பல்வேறு சோஷியல் மீடியா தளத்திலும் இந்த ஃபோட்டோ பகிரப்பட்டு பெரும் விவாதங்கள் உருவாகின. விமான பயணங்களில் ஏற்கெனவே இதுபோன்ற பல சம்பவங்கள் நடந்திருக்கிறது. எனவே, இந்த சம்பவங்களினால் பாதிக்கப்பட்டிருந்த முன்னாள், இந்நாள் பயணிகள் எல்லோரும் இண்டிகோ நிறுவனத்திற்கு எதிராக பொங்கி எழ தொடங்கிவிட்டனர்.
சோஷியல் மீடியாவில் தங்களுக்கு எதிரான கருத்துக்கள் பகிரப்படுவதை கவனித்த இண்டிகோ நிறுவனம், இந்த விவகாரம் குறித்து விளக்கமளித்துள்ளது.
அதாவது "வழக்கமான தூய்மை பணிக்காக இதுபோன்று இருக்கைகளை கையோடு கழற்றி எடுத்து செல்வது வழக்கம். அதேபோலதான் இந்த முறையும் நடந்திருக்கிறது. சம்பந்தப்பட்ட சீட்டை புக் செய்திருந்த பயணிக்கு இது குறித்து ஏற்கெனவே தெரிவிக்கப்பட்டிருந்தது" என தெரிவித்திருக்கிறது.
ஆனால் இந்த விளக்கத்தை ஏற்க மறுத்த நெட்டிசன்கள் சிலர், "என்னதான் தூய்மை பணி என்றாலும் கூட ஒரு நியாயம் வேணாமா? விமானம் புறப்படும்போதுதான் தூய்மை பணியை மேற்கொள்வீர்களா?" என்று கேள்வி எழுப்பியுள்ளனர்.
கடந்த ஆண்டு டிசம்பர் மாதம் இண்டிகோ விமான பயணி ஒருவர், தான் புக் செய்திருந்த சீட்டில் குஷன் இல்லாமல் இருந்ததை கண்டு ஷாக்காகி, நிர்வாகத்திடம் முறையிட்டிருந்தார் என்பது குறிப்பிடத்தக்கது.
Click it and Unblock the Notifications
Sign in with Google