“பூதமே” இறங்கிருக்கு.. 200 ஆண்டில் 3 வது முறை.. சென்னையில் இவ்ளோ பெரிய மழையா! 1996 ஐ மறக்க முடியுமா?

சென்னை: கடந்த 200 ஆண்டுகளில் 3 முறையாக சென்னையில் ஜூன் மாதம் ஒரே நாளில் 150 மில்லி மீட்டருக்கும் அதிகமான அளவில் மழை பெய்து உள்ளதாக தமிழ்நாடு வெதர்மேன் பிரதீப் ஜான் தெரிவித்து உள்ளார்.

சென்னையில் நேற்று காலையில் இருந்தே பரவலாக பெய்யத் தொடங்கிய மழை, நள்ளிரவில் விஸ்வரூபம் எடுத்து வெளுத்து வாங்கி இருக்கிறது. நேற்று சென்னையின் பல்வேறு இடங்களில் 100 மில்லி மீட்டருக்கும் அதிகமான அளவில் மழை கொட்டித் தீர்த்து இருக்கிறது. குறிப்பாக சென்னை பெருங்குடி 14 வது மண்டலத்தில் 165 மில்லி மீட்டர் மழை கொட்டித்தீர்த்து உள்ளது. அதேபோல் காஞ்சிபுரம் அடையாறு எகோ பூங்காவில் 158.7 மிமீ மழையும், செங்கல்பட்டு மாவட்டம் ஆலந்தூரில் 156 மிமீ மழையும் பெய்துள்ளது.

இதுகுறித்து ட்விட்டரில் பதிவிட்டு இருக்கும் தமிழ்நாடு வெதர்மேன் பிரதீப் ஜான், "1991, 1996 மற்றும் 2023 ஆகிய 3 ஆண்டுகளில்தான் 150 மில்லி மீட்டருக்கும் அதிகமான மழை சென்னையில் பொழிந்து இருக்கிறது. வேறு ஆண்டுகளில் இதுபோல் மழை பதிவானது கிடையாது. ஜூன் மாதத்தில் கனமழை பெய்வது மிக மிக மிக அரிதானது. மழை காரணமாக ஜூன் மாதம் இதுவரை 3 முறை மட்டுமே பள்ளிகளுக்கு விடுமுறை விடப்பட்டு உள்ளது.

1996 எப்போது சிறப்பானது. அந்த ரெக்கார்டை உடைக்க முடியாது. இன்று சென்னையில் 150 மில்லி மீட்டருக்கும் அதிகமான மழை பொழிந்து இருக்கிறது. இது மிகவும் அரிதானது. ஜூன் மாதம் இப்படி ஒரு மழை பெய்தது மிக மிக அரிது." என்று குறிப்பிட்டு உள்ளார். அவர் வெளியிட்டுள்ள மழை விபரங்களின்படி, கடந்த 1991 ஆம் ஆண்டு ஜூன் 5 ஆம் தேதி செம்பரம்பாக்கத்தில் 251 மில்லி மீட்டர், ந்ங்கம்பாக்கத்தில் 184.4 மிமீ, செங்குன்றத்தில் 152 மிமீ மழை கொட்டி உள்ளது.

கடந்த 1996 ஆம் ஆண்டை வெதர்மேன் சிறப்பானது என்று சொல்ல முக்கிய காரணம் அந்த ஆண்டு ஜூன் 14 ஆம் தேதி பெய்த பேய் மழைதான். தாமரைப்பாக்கத்தில் 450 மிமீ, சோழவரத்தில் 450 மிமீ, சென்னை துறைமுகத்தில் 348.3 மிமீ, நுங்கம்பாக்கம் 347 மிமீ, செம்பரம்பாக்கம் 346 மிமீ, பொன்னேரி 293 மிமீ, திருவிளாங்காஅடு 250 என சென்னை, திருவள்ளூர், காஞ்சிபுரம், செங்கல்பட்டு மாவட்டங்களில் மழை வெளுத்து வாங்கியது.

அதற்கு பிறகு ஜூன் மாதத்தில் இந்த அளவுக்கு சென்னை மற்றும் சுற்றுவட்டார மாவட்டங்களில் இவ்வளவு பெரிய மழையை எதிர்கொண்டு இருக்கிறார்கள். சென்னை வானிலை மையம் வெளியிட்ட தகவலின்படி, "மீனம்பாக்கம் (சென்னை) 137.6, ஒய்எம்சிஏ நந்தனம் (சென்னை) 117.0, செம்பரம்பாக்கம் (காஞ்சிபுரம்) 109.5, மேற்கு தாம்பரம் (செங்கல்பட்டு) 82.0, ஏசிஎஸ் மருத்துவக் கல்லூரி (காஞ்சிபுரம்) 79.0, நுங்கம்பாக்கம் (சென்னை) 67.4, குட் வில் ஸ்கூல் வில்லிவாக்கம் (திருவள்ளூர்) 50.0, புழல் (திருவள்ளூர்) 46.5, சத்தியபாமா பல்கலைக்கழகம் (காஞ்சிபுரம்) 41.0, LMOIS கோலப்பாக்கம் (காஞ்சிபுரம்) 40.0, கட்டப்பாக்கம் கேவிகே (காஞ்சிபுரம்) 35.5, மாதவரம் (சென்னை) 34.0" என சென்னை சுற்று வட்டாரத்தில் அதிகபட்ச மழை பதிவாகி உள்ளது.

English summary

Tamil Nadu Weatherman Pradeep John has informed that three times in the last 200 years Chennai has received more than 150 mm of rain on a single day in June.