பாஜகவிலிருந்து விலகி அதிமுகவில் இணைந்த நடிகை கவுதமி, தடா பெரியசாமிக்கு முக்கிய பதவி!

Updated: Monday, October 21, 2024, 16:52 [IST]

Subscribe to Oneindia Tamil

சென்னை: பாஜகவிலிருந்த விலகி அதிமுகவில் இணைந்த நடிகை கவுதமிக்கும், தடா பெரியசாமிக்கும் முக்கிய பொறுப்புகளை அக்கட்சியின் பொதுச் செயலாளர் எடப்பாடி பழனிசாமி வழங்கியுள்ளார்.

நடிகை கவுதமிக்கு அதிமுக கொள்கை பரப்பு துணைச் செயலாளர் பதவியும் தடா பெரியசாமிக்கு எம்ஜிஆர் மன்ற துணைச் செயலாளர் பதவியும் வழங்கப்பட்டுள்ளது. இதற்கான உத்தரவுகளை எடப்பாடி பழனிசாமி அறிவித்திருந்தார்.

இதுதொடர்பாக எடப்பாடி பழனிசாமி இன்று வெளியிட்ட அறிக்கையில், "அதிமுக கொள்கை பரப்பு துணைச் செயலாளராக திரைப்பட நடிகை கவுதமி நியமனம் செய்யப்பட்டு உள்ளார். அனைத்துலக எம்ஜிஆர் மன்ற துணைச் செயலாளராக தடா பெரியசாமி நியமனம் செய்யப்படுகிறார்" என்று தெரிவித்துள்ளார்.

இதேபோல அதிமுக சிறுபான்மையின நலப் பிரிவு துணைச் செயலாளராக பாத்திமா அலியும், விவசாயப் பிரிவு துணைச் செயலாளராக கள்ளக்குறிச்சியைச் சேர்ந்த சன்னியாசியும் நியமனம் செய்யப்பட்டுள்ளதாக அறிவித்துள்ளார். முன்னதாக கள்ளக்குறிச்சி மாவட்ட விவசாயப் பிரிவு செயலாளர் பொறுப்பில் இருந்து விடுவிக்கப்பட்டுள்ளார்.

பாஜகவிலிருந்து அதிமுக வந்தவர்களுக்கு எடப்பாடி பழனிசாமி முக்கியத்துவம் தருவதாகவே இது பார்க்கப்படுகிறது. முன்னதாக பாஜக ஐடி விங் தலைவராக இருந்த சிடிஆர் நிர்மல் குமார் அக்கட்சியில் இருந்து விலகி அதிமுகவில் இணைந்ததும் அவருக்கு அதிமுக ஐடி விங் இணைச் செயலாளர் பதவி கொடுக்கப்பட்டுள்ளது குறிப்பிடத்தக்கது.

நடிகை கவுதமி பல ஆண்டுகளாக பாஜகவில் இருந்து வந்தார். அவர் விருதுநகர் மாவட்டம் ராஜபாளையம் சட்டசபை தொகுதியில் போட்டியிட வாய்ப்பு தரப்படும் என்பதால் 2021 ஆம் ஆண்டு அங்கேயே தங்கி கட்சி பணிகளில் ஈடுபட்டு வந்தார். ஆனால் அவருக்கு சீட் வழங்கப்படவில்லை. இதனால் கவுதமி அதிருப்தியில் இருந்து வந்ததாக தெரிகிறது.

இதனிடையே தனது சொத்தை பாஜகவை சேர்ந்த நிர்வாகி அழகப்பன் ஏமாற்றியதாக பாஜக தலைமையிடம் புகார் தெரிவித்தும் தனக்கு ஆதரவாக யாரும் செயல்படவில்லை என்ற காரணத்தால் பாஜகவில் இருந்து கடந்த ஆண்டு கவுதமி விலகினார். இதையடுத்து இந்த ஆண்டு பிப்ரவரி மாதம் எடப்பாடி பழனிசாமியை நேரில் சந்தித்து அதிமுகவில் இணைந்தார். லோக்சபா தேர்தலிலும் அவர் அதிமுகவுக்கு ஆதரவாக பிரச்சாரம் செய்தார்.

அது போல் பாஜக எஸ்சி அணி மாநிலத் தலைவராக இருந்த தடா பெரியசாமி, லோக்சபா தேர்தலில் தனது சொந்த ஊர் அமைந்துள்ள சிதம்பரம் தொகுதியில் தனக்கு சீட் வழங்காமல் வேலூரை சேர்ந்த கார்த்தியாயினிக்கு சீட் வழங்கியதால் அதிருப்தி அடைந்த அவர் பாஜகவிலிருந்து விலகி அதிமுகவில் இணைந்தார்.